ប៉ុន្មានថ្ងៃកន្លងទៅនេះ អ្នកនយោបាយនិងបញ្ញវន្តបរទេសជាច្រើនរូបបានបង្ហាញពីគោលជំហរគាំទ្រចំពោះការដែលសភាតំណាងប្រជាជនទូទាំងប្រទេសចិនបានអនុម័តច្បាប់សន្តិសុខជាតិដែលពាក់ព័ន្ធនឹងតំបន់ហុងកុង ហើយថ្លែងថា កិច្ចការតំបន់ហុងកុងជាកិច្ចការផ្ទៃក្នុងរបស់ចិន ច្បាប់សន្តិសុខជាតិដែលពាក់ព័ន្ធនឹងតំបន់ហុងកុងនឹងមានអំណោយផលដល់ការបង្ការនិងផ្តន្ទាទោសតាមផ្លូវច្បាប់ទៅលើសកម្មភាពបំផ្លាញសន្តិសុខជាតិចិនដែលកើតឡើងនៅតំបន់ហុងកុង ជាវិធានការដ៏សំខាន់សម្រាប់គាំពារផលប្រយោជន៍នៃការអភិវឌ្ឍនិងសន្តិសុខអធិបតេយ្យភាពជាតិចិន ដែលនឹងការពារសុវត្ថិភាពរបស់អ្នកតំបន់ហុងកុង ហើយសមស្របនឹងការកំណត់នៃច្បាប់មូលដ្ឋានរបស់ហុងកុង ។
លោក Sourabh Gupta សមាជិកស្រាវជ្រាវជាន់ខ្ពស់នៃមជ្ឈមណ្ឌលស្រាវជ្រាវអំពីប្រទេសចិននិងសហរដ្ឋអាមេរិករបស់អាមេរិកបានថ្លែងថា ចិនជំរុញការតាក់តែងច្បាប់សន្តិសុខជាតិនៅតំបន់ហុងកុងគឺក្នុងគោលបំណងការពារសន្តិសុខជាតិគឺសមស្របនឹងការកំណត់នៃច្បាប់មូលដ្ឋាននៃតំបន់ហុងកុងទាំងស្រុង ។
លោក David Janna ទីប្រឹក្សាកិច្ចការប្រទេសចិននៃរដ្ឋាភិបាលកូឡុំប៊ីបានថ្លែងថា តំបន់ហុងកុងជាចំណែកមួយរបស់ប្រទេសចិន ការតាក់តែងច្បាប់សន្តិសុខជាតិអាចធានាបានសុខសុវត្ថិភាពរបស់អ្នករស់នៅហុងកុង ។ ប្រទេសចិនមានសិទ្ធិធ្វើបែបនេះ ហើយក៏ចាំបាច់ធ្វើបែបនេះដែរ ។
លោក M.D.Nalapat អ្នកជំនាញខាងបញ្ហាប្រទេសចិនរបស់ប្រទេសឥណ្ឌាបានសម្គាល់ថា និយាយចំពោះប្រទេសចិន ការវាយប្រហារទៅលើសកម្មភាពអបគមន៍និយមគឺមានសារសំខាន់ណាស់ ការប៉ុនប៉ងធ្វើអបគមន៍ណាមួយសុទ្ធតែត្រូវបរាជ័យមិនខាន ។
