កាលពីថ្ងៃទី ៣០ ខែឧសភា លោកCuiTiankai ឯកអគ្គរដ្ឋទូតចិនប្រចាំនៅអាមេរិកបានចេញផ្សាយអត្ថបទមួយនៅលើវេបសាយនៃទីភ្នាក់ងារព័ត៌មានBloomburgដោយបានលើកឡើងថា ការតាក់តែងប្រព័ន្ធច្បាប់និងយន្តការអនុវត្តពាក់ព័ន្ធនឹងសន្តិសុខជាតិនៅតំបន់ហុងកុងនឹងធានាដល់ការអនុវត្តដោយនឹងនរនិងយូរអង្វែងនូវគោលការណ៍ប្រទេសមួយ ប្រព័ន្ធគ្រប់គ្រងពីរ វាមានអំណោយផលដល់ភាពរុងរឿងនិងស្ថិរភាពដ៏យូរអង្វែងរបស់ហុងកុង ។
អត្ថបទចែងថា បន្ទាប់ពីហុងកុងកើតមានភាពចលាចលដោយសារការធ្វើវិសោធនកម្មលក្ខន្តិកៈច្បាប់ហុងកុងនាឆ្នាំទៅ អ្នកបាតុករហិង្សាបានវាយប្រហារប៉ូលីស វាយប្រហារនិងបង្ខាំងដោយខុសច្បាប់នូវអ្នកធ្វើដំណើរស្លូតត្រង់ និងវាយសម្រុកចូលអគាររដ្ឋបាលជាដើម អំពើហិង្សាទាំងនេះធ្វើឱ្យមុខរបរនានានៅហុងកុងធ្លាក់ទន់ខ្សោយ ។ អស់កាលជាយូរមក ហុងកុងស្ថិតក្នុងភាពកង្វះខាតការការពារខាងសន្តិសុខជាតិ ធ្វើឱ្យហុងកុងធ្លាក់ចូលភាពច្របូកច្របល់ សន្តិសុខជាតិចិនត្រូវរងការបំផ្លាញ ។ ហេតុនេះ ការបំពេញចន្លោះខ្វះខាតដែលមានហានិភ័យខាងសន្តិសុខជាតិនៃហុងកុងតាមរយៈការតាក់តែងច្បាប់ដោយរដ្ឋ គឺជារឿងបន្ទាន់មួយ ។ ពេលកន្លងទៅថ្មីៗនេះ មហាសន្និបាតនៃសភាតំណាងប្រជាជនទូទាំងប្រទេសចិននីតិកាលទី ១៣ បានធ្វើសេចក្តីសម្រេចចិត្តអំពីការបង្កើតប្រព័ន្ធច្បាប់និងយន្តការអនុវត្តពាក់ព័ន្ធនឹងសន្តិសុខជាតិនៅតំបន់ហុងកុង ទទួលបានការគាំទ្រនិងឆ្លើយតបយ៉ាងសកម្មពីប្រជាជនចិន ក្នុងនោះរួមមានជនរួមជាតិហុងកុងផង វាជាក្តីបំណងរួមរបស់ប្រជាជន ។
អត្ថបទចែងថា ការតាក់តែងច្បាប់នេះគឺសំដៅចំពោះសកម្មភាពបំផ្លាញដល់សន្តិសុខជាតិចិន ដូចជាការធ្វើអបគមន៍ ការធ្វើវិទ្ធង្សនារដ្ឋអំណាច ការធ្វើសកម្មភាពភេរវកម្មនិងការជ្រៀតជ្រែកពីបរទេសនិងកម្លាំងខាងក្រៅជាដើម ។ បុគ្គលណាមួយដែលគ្មានពាក់ព័ន្ធនឹងករណីទាំងនេះ គឺអាចរស់នៅនិងធ្វើអាជីវកម្មយ៉ាងសុខសាន្តនៅហុងកុង ។ ការតាក់តែងច្បាប់នេះនឹងធានាដល់សិទ្ធិស្វ័យភាពខ្ពស់តាមច្បាប់នៃតំបន់ហុងកុងឱ្យបានកាន់តែល្អ មានអំណោយផលដល់ការគាំពារបរិយាកាសនីតិរដ្ឋនិងបរិយាកាសធ្វើអាជីវកម្មនៃហុងកុង ។ ផលប្រយោជន៍នៃការអភិវឌ្ឍហុងកុងដោយនឹងនរនិងយូរអង្វែងនឹងនាំមកនូវកាលានុវត្តភាពកាន់តែច្រើន និងផ្តល់ផលប្រយោជន៍ដល់ប្រជាជននៃតំបន់នានាលើពិភពលោកដែលទៅបំពេញការងារ វិនិយោគនិងរស់នៅហុងកុង ៕