បាតុកម្មតវ៉ានិងចលាចលបណ្តាលមកពីករណីដែលបុរសជនជាតិស្បែកខ្មៅត្រូវបានប៉ូលិសជនជាតិស្បែកសម្នាក់ក្នុងរដ្ឋ Minnesota ប្រព្រឹត្តហិង្សារហូតដល់ស្លាប់ បន្តកើតឡើងនៅតំបន់ជាច្រើនក្នុងសហរដ្ឋអាមេរិកកាលពីថ្ងៃទី ៣១ ខែឧសភា ។ តាមស្ថិតិនៃប្រព័ន្ធផ្សព្វផ្សាយ CNN អាមេរិកបានឱ្យដឹងថា ទីក្រុងយ៉ាងហោចណាស់ ៤០ នៅក្នុងសហរដ្ឋអាមេរិកបានដាក់ចេញបម្រាមគោចរ ។ រដ្ឋធានីវ៉ាស៊ីនតោននិងរដ្ឋយ៉ាងហោចណាស់ ១៥ បានចាត់បញ្ជូនកងកម្លាំងឆ្មាំជាតិទៅបង្ក្រាបសកម្មភាពបាតុកម្ម ។
ក្នុងក្រុងវ៉ាស៊ីនតោន បាតុករបានប្រទូសរ៉ាយជាមួយកងកម្លាំងអនុវត្តច្បាប់នៅក្បែរសេតវិមានពីយប់ថ្ងៃទី ៣០ ខែឧសភាដល់ព្រឹកព្រលឹមថ្ងៃទី ៣១ ខែឧសភា ។
លោក Tim waltz អភិបាលរដ្ឋ Minnesota បានប្រកាសនៅរដ្ឋ Minnesotaកាលពីថ្ងៃទី ៣១ ខែឧសភាថា នឹងពន្យារពេលអនុវត្តបម្រាមគោចរនៅទីក្រុង Minneapolis និងទីក្រុង Saint Paul មួយថ្ងៃទៀត។
បាតុកម្មនៅក្នុងទីក្រុង San Franciscoកាលពីយប់ថ្ងៃទី ៣១ ខែឧសភាបានកើតជាចលាចលយ៉ាងខ្លាំង ។ ហាងលក់ទំនិញជាច្រើនត្រូវបានដុតកម្ទេចនិងឆក់ប្លន់ ។ តំបន់ Chinatown ក៏បានរងផលប៉ះពាល់ផងដែរ រហូតដល់ព្រឹកព្រលឹមថ្ងៃទី ៣១ ខែឧសភា ទើបប៉ូលិសអាចគ្រប់គ្រងស្ថានការណ៍បាន ។
កាលពីយប់ថ្ងៃទី ៣០ ខែឧសភា រដ្ឋបាលរដ្ឋ Californiaបានប្រកាសដាក់ក្រុងLos Angeles ចូលក្នុងភាពអាសន្ន ព្រមទាំងបានចាត់បញ្ចូនកងកម្លាំងឆ្មាំជាតិប្រមាណ ១ ពាន់នាក់ទៅប្រចាំនៅតំបន់កើតចលាចលខ្លាំងទៀតផង ។