ក្នុងសន្និសីទសារព័ត៌មានដែលបានបើកធ្វើកាលពីថ្ងៃទី២៤ខែឧសភា លោកវ៉ាងអ៊ីសមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិនបានបង្ហាញនូវក្តីបំណងរបស់ចិនស្តីពីការបង្កើនកិច្ចសហប្រតិបត្តិការពហុភាគីក្នុងបរិបទកើតមានវិបត្តិសុខាភិបាលសាធារណៈជាសកល ក៏ដូចជាការប្តេជ្ញាចិត្តយ៉ាងមុតមាំក្នុងការគាំពារអធិបតេយ្យភាពជាតិនិងការគិតពិចារណាចំពោះការអភិវឌ្ឍនៅពេលអនាគតរបស់ពិភពលោកទាំងមូលដែលបានបង្ហាញយ៉ាងពេញលេញនូវទស្សនៈស្តីពីសហគមន៍រួមវាសនាតែមួយរបស់មនុស្សជាតិដែលផ្តួចផ្តើមដោយថ្នាក់ដឹកនាំកំពូលរបស់ចិន។
ជាបឋម ប្រឈមនឹងបញ្ហាជាចំណុចក្តៅ លោកបានបង្ហាញឱ្យឃើញនូវភាពនឹងធឹង ជំនឿចិត្តលើខ្លួនឯងនិងប្រកបដោយវិចារណញ្ញាណ បន្ទាប់មក លោកបានឆ្លើយតបនឹងបញ្ហាពាក់ព័ន្ធនឹងហុងកុងនិងតៃវ៉ាន់ដោយសមហេតុផលនិងមានភស្តុតាងច្បាស់លាស់ ដើម្បីគាំពារយ៉ាងមុតមាំនូវអធិបតេយ្យភាពជាតិ ទី៣ លោកបានលើកពីផែនការចិនដើម្បីធ្វើឱ្យប្រព័ន្ធអភិបាលកិច្ចជាសកលមានសុក្រឹតភាពដែលបានបង្ហាញនូវទំនួលខុសត្រូវខ្ពស់ចំពោះការអភិវឌ្ឍសង្គមមនុស្សជាតិ។
បណ្តាប្រទេសនានាបានរួមរស់នៅលើភពផែនដីតែមួយ តាមពិត មនុស្សជាតិគឺជាសហគមន៍រួមវាសនាតែមួយ មានតែការមិនបែងចែកតំបន់និងពូជសាសន៍ លុបបំបាត់ទស្សនៈលំអៀងនិងការចងគំនុំ និងប្រកាន់ខ្ជាប់សាមគ្គីភាពនិងកិច្ចសហប្រតិបត្តិការនោះទេ ទើបមនុស្សជាតិអាចយកឈ្នះលើជំងឺឆ្លងនៅទីបំផុត ហើយទទួលបានការអភិវឌ្ឍថ្មី។ ក្នុងនាមជាប្រទេសធំដែលមានទំនួលខុសត្រូវ ប្រទេសចិននឹងបន្តរួមចំណែកតាមលទ្ធភាពរបស់ខ្លួនក្នុងការប្រយុទ្ធប្រឆាំងនឹងជំងឺឆ្លងជាសកល ឈរនៅជាមួយផលប្រយោជន៍រួមនៃប្រទេសនានាលើពិភពលោកជាប់រហូត ក៏ដូចជាឈរនៅជាមួយចរន្តអភិវឌ្ឍន៍នៃប្រវត្តិសាស្រ្តផងដែរ ៕