ការបើកធ្វើមហាសន្និបាតសភាតំណាងប្រជាជនទូទាំងប្រទេសចិននិងសភាប្រឹក្សានយោបាយប្រជាជនទូទាំងប្រទេសចិនឆ្នាំ ២០២០ បានប្រមូលផ្តុំនូវការយកចិត្តទុកដាក់ជាសកល ហើយក៏ជាក្តីរំពឹងរបស់ឥស្សរជនមកពីគ្រប់មជ្ឈដ្ឋាននៃអាហ្វ្រិកផងដែរ។កាលពីប៉ុន្មានថ្ងៃពីរបីមក អ្នកសារព័ត៌មានបានធ្វើបទសម្ភាសន៍តាមប្រព័ន្ធវីដេអូជាមួយអ្នកជំនាញនិងអ្នកប្រាជ្ញមកពីបណ្តាប្រទេសអាហ្វ្រិកជាច្រើន ពួកគេបានវាយតម្លៃខ្ពស់ចំពោះកិច្ចខិតខំប្រឹងប្រែងឥតឈប់ឈររបស់ចិនក្នុងការពង្រីកភាពបើកទូលាយដោយមិនងាករ៉េ ធ្វើឱ្យខ្សែសង្វាក់នៃឧស្សាហកម្មនិងផ្គត់ផ្គង់មានស្ថិរភាពនិងជំរុញការកែទម្រង់និងការអភិវឌ្ឍតាមរយៈការបើកទូលាយ។
លោក Gert Grobler គឺជាអតីតមន្រ្តីការទូតនៃក្រសួងទំនាក់ទំនងអន្តរជាតិនិងសហប្រតិបត្តិការអាហ្វ្រិកខាងត្បូង។លោកបានថែ្លងនៅក្នុងបទសម្ភាសន៍ជាមួយអ្នកសារព័ត៌មានថា ការដែលប្រទេសចិនមិនបានកំណត់គោលដៅអភិវឌ្ឍន៍ជាក់លាក់សម្រាប់កំណើនសេដ្ឋកិច្ចក្នុងរបាយការណ៍ការងាររដ្ឋាភិបាលចិននៅឆ្នាំនេះនោះទេ គឺជាសេចក្តីសម្រេចចិត្តបែបសមហេតុផលនិងវិទ្យាសាស្ត្រដែលបានធ្វើឡើងដោយប្រទេសចិនក្នុងបរិបទនៃការរងផលប៉ះពាល់ដែលបណ្តាលមកពីការរាតត្បាតនៃជំងឺឆ្លងនិងមានភាពមិនប្រាកដប្រជាយ៉ាងខ្លាំង។
ប្រធានសមាគមកិច្ចសហប្រតិបត្តិការនិងអភិវឌ្ឍន៍រវាងចិននិងអាហ្វ្រិកនៃប្រទេសម៉ារ៉ុកបានថែ្លងក្នុងបទសម្ភាសន៍ជាមួយអ្នកសារព័ត៌មានថា ប្រទេសចិនបានធ្វើការចាត់ចែងយ៉ាងជាក់លាក់សម្រាប់ការរួមគ្នាកសាងគំនិតផ្តួចផ្តើម"ខ្សែក្រវាត់និងផ្លូវ"ដែលមានគុណភាពខ្ពស់និងការជំរុញសេរីភាវូបនីយកម្មនិងកម្រិតសម្របសម្រួលផ្នែកពាណិជ្ជកម្មនិងវិនិយោគជាដើម វាមានលក្ខណៈចំគោលដៅយ៉ាងខ្លាំង។គ្រប់មជ្ឈដ្ឋាននៅម៉ារ៉ុកនឹងឆ្លើយតបយ៉ាងសកម្មចំពោះគំនិតផ្តួចផ្តើម"ខ្សែក្រវាត់និងផ្លូវ"និងពង្រឹងកិច្ចសហប្រតិបត្តិការឱ្យកាន់តែស៊ីជម្រៅជាមួយប្រទេសចិន៕
