តាមរបាយការណ៍ការងាររដ្ឋាភិបាលដែលដាក់ជូនមហាសន្និបាតសភាតំណាងប្រជាជនទូទាំងប្រទេសចិនពិនិត្យពិភាក្សានៅថ្ងៃទី២២ខែឧសភាបានបង្ហាញថា ប្រទេសចិននឹងអនុវត្តប្រតិបត្តិការ៣ឆ្នាំស្តីពីការធ្វើកំណែទម្រង់សហគ្រាសកម្មសិទ្ធិរដ្ឋ ដើម្បីកែលម្អប្រព័ន្ធត្រួតពិនិត្យនិងគ្រប់គ្រងទ្រព្យសម្បត្តិជាតិ ធ្វើឱ្យស៊ីជម្រៅនូវកំណែទម្រង់នៃប្រព័ន្ធសហកម្មសិទ្ធិ។ សហគ្រាសកម្មសិទ្ធិរដ្ឋត្រូវផ្តោតសំខាន់ទៅលើទំនួលខុសត្រូវសំខាន់និងអាជីវកម្មសំខាន់ធ្វើឱ្យយន្តការធ្វើអាជីវកម្មមានសុក្រឹតភាពតាមរយៈការធ្វើទីផ្សារភាវូបនីយកម្ម ដើម្បីលើកកម្ពស់កម្លាំងប្រកួតប្រជែងជាស្នូល ។ របាយការណ៍បានគូសបញ្ជាក់ទៀតថា ត្រូវកែលម្អបរិយាកាសនៃការអភិវឌ្ឍសេដ្ឋកិច្ចឯកជន ធានាឱ្យសហគ្រាសឯកជនទទួលបានកត្តាផលិតកម្មនិងការគាំទ្រខាងគោលនយោបាយដោយសមភាព ជម្រះចោលការកំណត់មិនសមហេតុផលដែលមានទំនាក់ទំនងជាមួយបុគ្គលិកលក្ខណៈរបស់សហគ្រាស កំណត់កាលបរិច្ឆេទសម្រាប់សងបំណុលដល់សហគ្រាសឯកជននិងសហគ្រាសធុនតូចនិងមធ្យមដែលក្រសួងស្ថាប័នរដ្ឋាភិបាលបានជំពាក់ ជំរុញសេដ្ឋកិច្ចមិនមែនកម្មសិទ្ធិរដ្ឋឱ្យអភិវឌ្ឍដោយរឹងមាំ។
