លោក Grusko អនុរដ្ឋមន្ត្រីការបរទេសរុស្ស៊ីបានថ្លែងកាលពីថ្ងៃទី ២១ ខែឧសភាថា ការចាកចេញពី«សន្ធិសញ្ញាស្តីពីការបើកចំហដែនអាកាស»របស់អាមេរិកនឹងវាយប្រហារម្តងទៀតចំពោះប្រព័ន្ធសន្តិសុខយោធាអឺរ៉ុប ។
ប្រព័ន្ធផ្សព្វផ្សាយរបស់រុស្ស៊ីបានដកស្រង់ពាក្យសម្តីរបស់លោក Grusko កាលពីថ្ងៃទី ២១ ខែឧសភាថា ពេលបច្ចុប្បន្ន រុស្ស៊ីមិនទាន់ទទួលបានការជូនដំណឹងជាផ្លូវការស្តីពីការដកខ្លួនចេញពី«សន្ធិសញ្ញាស្តីពីការបើកចំហដែនអាកាស»របស់អាមេរិកនៅឡើយទេ ។ មុននេះ រដ្ឋាភិបាលអាមេរិកបានប្រកាសដកខ្លួនចេញពី«សន្ធិសញ្ញាលុបបំបាត់គ្រាប់មីស៊ីលរយៈចម្ងាយខ្លីនិងមធ្យមរវាងអាមេរិកនិងអតីតសហភាពសូវៀត» ។ ទង្វើបែបនេះបានបន្សោយប្រព័ន្ធសន្តិសុខយោធាអឺរ៉ុប ។ ការដកខ្លួនចេញពី«សន្ធិសញ្ញាស្តីពីការបើកចំហដែនអាកាស»របស់អាមេរិកនឹងវាយប្រហារម្តងទៀតចំពោះប្រព័ន្ធនេះ ព្រមទាំងបំផ្លាញដល់ផលប្រយោជន៍របស់រដ្ឋសមាជិកនៃសន្ធិសញ្ញាដែលជាសម្ព័ន្ធមិត្តរបស់អាមេរិកទៀតផង ។
ក្រសួងការបរទេសអាមេរិកបានថ្លែងកាលពីថ្ងៃទី ២១ ខែឧសភាថា សហរដ្ឋអាមេរិកនឹងជូនដំណឹងស្តីពីការសម្រេចចិត្តដកខ្លួនចេញពី«សន្ធិសញ្ញាស្តីពីការបើកចំហដែនអាកាស» ដល់រដ្ឋសមាជិកនៃសន្ធិសញ្ញាទាំងអស់ ។
សូមបញ្ជាក់ថា «សន្ធិសញ្ញាស្តីពីការបើកចំហដែនអាកាស» ត្រូវបានចុះហត្ថលេខាកាលពីឆ្នាំ ១៩៩២ ហើយបានចូលជាធរមានចាប់ពីឆ្នាំ២០០២ ។ ប្រទេសចូលរួមសន្ធិសញ្ញាមានសិទ្ធិធ្វើការស៊ើបការណ៍ដោយមិនមែនប្រដាប់អាវុធនៅលើដែនអាកាសរបស់ប្រទេសជាដៃគូតាមច្បាប់កំណត់ ។