ស្ថាប័នអំណាចកំពូលនៃប្រទេសចិនបានប្រារព្ធធ្វើមហាសនិ្នបាតប្រចាំឆ្នាំនៅក្រុងប៉េកាំងនាថ្ងៃទី២២ខែឧសភា។របាយការណ៍ការងាររដ្ឋាភិបាលចិនដែលបានដាក់ជូនមហាសន្និបាតពិនិត្យពិភាក្សាបានគូសបញ្ជាក់ថា ប្រទេសចិននឹងជំរុញការបើកទូលាយចំពោះអន្តរជាតិក្នុងកម្រិតកាន់តែខ្ពស់ ក៏ដូចជាលំនឹងមូលដ្ឋានគ្រឹះនៃពាណិជ្ជកម្មជាមួយក្រៅប្រទេសនិងមូលធនបរទេស។
ក្នុងឆ្នាំ២០១៩ ការបើកទូលាយចំពោះអន្តរជាតិនៃប្រទេសចិនបានបោះជំហានដ៏សំខាន់មួយទៅខាងមុខដោយបានទទួលផ្លែផ្កាក្នុងកិច្ចកសាងខ្សែក្រវាត់និងផ្លូវ បានដាក់ចេញលក្ខន្តិកៈប្រតិបត្តិនៃច្បាប់វិនិយោគរបស់ពាណិជ្ជករបរទេសនិងបានបង្កើតនូវតំបន់ពិសោធន៍ផ្នែកពាណិជ្ជកម្មសេរីសៀងហៃ ក្នុងខណៈពេលពាណិជ្ជកម្មជាមួយក្រៅប្រទេសនិងមូលធនបរទេសមានភាពនឹងនរ។
របាយការណ៍ការងាររដ្ឋាភិបាលបានលើកឡើងថា ប្រទេសចិននឹងបន្តជំរុញសេរីភាពនិងធ្វើកិច្ចសម្រួលពាណិជ្ជកម្មនិងការបណ្តាក់ទុន បន្តគាំពារយន្តការពាណិជ្ជកម្មពហុភាគីយ៉ាងម៉ឺងម៉ាត់និងចូលរួមការធ្វើកំណែទម្រង់នៃអង្គការពាណិជ្ជកម្មពិភពលោកយ៉ាងសកម្ម។ក្រៅពីនេះ ខិតខំជំរុញការចុះហត្ថលេខាលើកិច្ចព្រមព្រៀងទំនាក់ទំនងភាពជាដៃគូសេដ្ឋកិច្ចដោយគ្រប់ជ្រុងជ្រោយក្នុងតំបន់និងជំរុញការចរចាស្តីពីពាណិជ្ជកម្មសេរីរវាងចិន ជប៉ុននិងកូរ៉េខាងត្បូង។ក៏ដូចជាការអនុវត្តរួមគ្នានូវកិច្ចព្រមព្រៀងសេដ្ឋកិច្ចពាណិជ្ជកម្មដំណាក់កាលទី១រវាងចិននិងអាមេរិកផងដែរ។ប្រទេសចិនផ្តោតសំខាន់លើការបង្កើនកិច្ចសហប្រតិបត្តិការផ្នែកសេដ្ឋកិច្ចនិងពាណិជ្ជកម្មរវាងប្រទេសនានាក្នុងន័យសម្រេចការផ្តល់ផលប្រយោជន៍ដល់គ្នានិងឈ្នះ-ឈ្នះ។
