ពេលកន្លងទៅនេះ លោកPompeo រដ្ឋមន្ត្រីការបរទេសអាមេរិកបានចេញផ្សាយសេចក្តីថ្លែងការណ៍មួយដើម្បីអបអរសាទរលោកស្រីCai Yingwen ឡើងកាន់តំណែងជាមេដឹកនាំតំបន់តៃវ៉ាន់នៃប្រទេសចិន ដោយបានហៅលោកស្រីថាជា“ប្រធានាធិបតី” និងបាននិយាយផ្តេសផ្តាសពី“ទំនាក់ទំនងភាពជាដៃគូ”រវាងអាមេរិកនិងតំបន់តៃវ៉ាន់ ។ នេះជាលើកទី១ដែលរដ្ឋមន្ត្រីការបរទេសអាមេរិកថ្លែងសារអបអរជាចំហចំពោះការឡើងកាន់តំណែងនៃមេដឹកនាំតំបន់តៃវ៉ាន់ក្នុងអំឡុងពេលរាប់សិបឆ្នាំមក ។ ទង្វើនេះបានល្មើសយ៉ាងធ្ងន់ធ្ងរលើគោលការណ៍មានប្រទេសចិនតែមួយនិងការកំណត់នៃសេចក្តីថ្លែងការណ៍រួមចំនួន ៣ រវាងចិននិងអាមេរិក បានជ្រៀតជ្រែកយ៉ាងកម្រោលនូវកិច្ចការផ្ទៃក្នុងនៃប្រទេសចិន ជាការបង្ករឿងជាសាធារណៈចំពោះប្រទេសចិន ហើយក៏បានបង្ហាញឱ្យឃើញនូវចរិតជាអ្នកល្មោភល្បែងនយោបាយរបស់លោកដែលហ៊ានធ្វើកិច្ចការគ្រោះថ្នាក់ដើម្បីទាញយកប្រយោជន៍ខ្លួននិងយកផលប្រយោជន៍ជាតិអាមេរិកធ្វើជាថ្នូរសម្រាប់ភ្នាល់ ។
នៅក្នុងបរិបទដែលការបង្ការនិងគ្រប់គ្រងជំងឺកូវីដ១៩របស់អាមេរិកមានភាពច្របូកច្របល់និងការដើរទម្លាក់កំហុស លោកPompeoបានបែរមុខព្រួញទៅរកតៃវ៉ាន់ម្តងទៀត គឺក្នុងគោលបំណងបង្វែរចំណាប់អារម្មណ៍ក្នុងស្រុក កេងចំណេញសន្លឹកឆ្នោតដោយធ្វើដូចជាខ្លាំងចំពោះប្រទេសចិន ហើយសន្សំដើមទុននយោបាយដើម្បីសម្រេចមហិច្ឆតានយោបាយដែលកាន់តែរីកធំពីមួយថ្ងៃទៅមួយថ្ងៃ ។
ដោយឈរលើការគិតគូរតែប្រយោជន៍នយោបាយបែបនេះ លោកPompeoមិនបានតម្កល់ទុកអាយុជីវិតមនុស្សជាសំខាន់ក្នុងការទប់ទល់ជំងឺកូវីដ១៩នោះទេ បែរជាវាយប្រហារអ្នកដទៃក្នុងនាមជាមន្ត្រីការទូតទី១នៃអាមេរិកទៅវិញ ហើយបំផ្លាញដល់កិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងនឹងជំងឺកូវីដ១៩ជាញឹកញាប់ ។ ជាពិសេសការមួលបង្កាច់ប្រទេសចិន ទោះបីជាគ្មានភស្តុតាងអ្វីនិងត្រូវមជ្ឈដ្ឋានវិទ្យាសាស្ត្រចេញមុខបដិសេធក្តី ក៏លោកនៅតែនិយាយកុហកសាចុះសាឡើងដដែល ។
ប្រវត្តិសាស្ត្រនឹងកាត់ក្តីដោយយុត្តិធម៌ចំពោះមនុស្សដូចជាលោកPompeoបែបនេះ ហើយមហិច្ឆតាល្មោភអំណាចរបស់លោកក៏មុខជាក្លាយជាការយល់សុបិនប៉ុណ្ណោះ ៕