អំឡុងពេលបើកធ្វើមហាសន្និបាតសភាតំណាងប្រជាជនទូទាំងប្រទេសចិននិងសភាប្រឹក្សានយោបាយប្រជាជនទូទាំងប្រទេសចិនឆ្នាំ ២០២០ ពិភពលោកទាំងមូលកំពុងប្រឈមមុខនឹងការរាតត្បាតនៃជំងឺកូវីដ ១៩ ហើយកត្តាមិនប្រាកដប្រជាផ្សេងៗកំពុងកើនឡើង។ស្ថិតក្រោមបរិបទពិសេសបែបនេះ តើប្រទេសចិនត្រូវធ្វើដូចម្តេចដើម្បីធានាដល់ការសម្រេចបាននូវទិសដៅភារកិច្ចនៃការអភិវឌ្ឍសេដ្ឋកិច្ចនិងសង្គមគឺជាបញ្ហាសំខាន់មួយនៃមហាសន្និបាតនៃសភាទាំងពីរលើកនេះ។
ការផ្ទុះឡើងភ្លាមៗនូវការរីករាលដាលនៃជំងឺឆ្លងគឺមិនបានរារាំងដល់កិច្ចខិតខំប្រឹងប្រែងរបស់ប្រទេសចិនក្នុងការសម្រេចឱ្យបាននូវគោលដៅអភិវឌ្ឍន៍សេដ្ឋកិច្ចនិងសង្គមនៅឆ្នាំនេះនោះទេ។ក្រោមការជំរុញប្រកបដោយការប្តេជ្ញាចិត្តយ៉ាងមុតមាំ ក៏ដូចជាវិធានការជាក់ស្តែងនិងកម្លាំងចលករថ្មីដែលប្រមូលផ្តុំជាបន្តបន្ទាប់ ប្រទេសចិនមានជំនឿចិត្ត មានលក្ខណសម្បត្តិគ្រប់គ្រាន់និងមានសមត្ថភាពក្នុងការសម្រេចបាននូវគោលដៅអភិវឌ្ឍន៍សេដ្ឋកិច្ចនិងសង្គមនៅឆ្នាំនេះតាមពេលកំណត់។
ទីមួយ គណបក្សកាន់អំណាចចិនតែងតែតម្កល់ការងារលុបបំបាត់ភាពក្រីក្រជាភារកិច្ចចម្បងក្នុងអភិបាលកិច្ចជាតិ។ចាប់តាំងពីសមាជបក្សកុម្មុយនិស្តចិនលើកទី ១៨ មក លោក ស៊ីជីនភីង មេដឹកនាំកំពូលចិនបានចាត់ចែងនិងត្រួតពិនិត្យដោយផ្ទាល់នូវទិសដៅនិងវិធីសាស្ត្រសម្រាប់លុបបំបាត់ភាពក្រីក្រដោយគ្រប់ជ្រុងជ្រោយ។កាលពីថ្ងៃទី ៦ ខែមីនា ឆ្នាំនេះ លោក ស៊ីជីនភីង បានថ្លែងនៅក្នុងសន្និសីទតាមប្រព័ន្ធវីដេអូថា គិតរហូតដល់ឆ្នាំ ២០២០ ចំនួនប្រជាជនក្រីក្រនៅតាមជនបទទាំងអស់នឹងត្រូវបានលុបបំបាត់ភាពក្រីក្រតាមស្តង់ដាបច្ចុប្បន្នដែលជាការប្តេជ្ញាចិត្តដ៏ធំធេងរបស់គណៈកម្មាធិការមជ្ឈិមបក្សចំពោះប្រជាជនទូទាំងប្រទេស ហើយត្រូវតែសម្រេចឱ្យបានតាមពេលកំណត់។
យោងតាមទិន្នន័យរបស់ធនាគារពិភពលោកបានឱ្យដឹងថា ការកាត់បន្ថយភាពក្រីក្ររបស់ប្រទេសចិនបានចូលរួមចំណែកច្រើនជាង ៧០ ភាគរយដល់ការកាត់បន្ថយភាពក្រីក្រនៅលើពិភពលោក។លោក Adhere Cavince អ្នកជំនាញខាងបញ្ហាអន្តរជាតិនៃប្រទេសកេនយ៉ាបានវាយតម្លៃថា សមិទ្ធផលរបស់ប្រទេសចិនក្នុងការកាត់បន្ថយភាពក្រីក្រ"គឺជាទង្វើដ៏មហាអស្ចារ្យមួយដែលមិនធ្លាប់មាននៅក្នុងប្រវត្តិសាស្រ្តមនុស្សជាតិ"។
អំឡុងពេលមហាសន្និបាតនៃសភាទាំងពីររបស់ចិនឆ្នាំនេះ តំណាងនៃសភាតំណាងប្រជាជននិងសមាជិកនៃសភាប្រឹក្សានយោបាយប្រជាជនទាំងឡាយនឹងលើកមតិយោបល់ដើម្បីសម្រេចគោលដៅអភិវឌ្ឍន៍តាមការគ្រោងទុកនិងធ្វើឱ្យ"ការលុបបំបាត់ភាពក្រីក្រ"ក្លាយជាចំណុចចាប់ផ្តើមថ្មីសម្រាប់ជនជាតិចិនបន្តរួមសាមគ្គីគ្នានិងតស៊ូពុះពារទៅមុខទៀត ៕
