រសៀលថ្ងៃទី២១ខែឧសភា សកម្មភាពយកបទសម្ភាសន៍លើកទីមួយនៃកិច្ចប្រជុំលើកទីបីនៃសភាប្រឹក្សានយោបាយប្រជាជនទូទាំងប្រទេសចិននីតិកាលទី១៣បានប្រារព្ធធ្វើនៅសាលសន្និសីទសារព័ត៌មាននៃវិមានសភាប្រជាជន ។ លោក Yang Changfeng សមាជិកសភាប្រឹក្សានយោបាយប្រជាជនទូទាំងប្រទេសចិន និងជាអគ្គវិស្វករនៃវិស្វកម្មប្រព័ន្ធណែនាំផ្លូវដោយផ្កាយរណប BeiDou របស់ចិនបានថ្លែងថា ផ្កាយរណបចុងក្រោយបង្អស់សម្រាប់ផ្គុំជាបណ្តាញនៃប្រព័ន្ធ BeiDou នៅទូទាំងពិភពលោកនឹងត្រូវបង្ហោះឡើងនៅខែមិថុនាឆ្នាំនេះ ។ ដល់ពេលនោះ បណ្តាញផ្កាយរណប BeiDou នឹងសម្រេចការគ្របដណ្តប់ទូទាំងពិភពលោក ។
លោក Yang Changfeng បានឧទ្ទេសនាមថា ក្នុងនាមជាប្រព័ន្ធអវកាសខ្នាតយក្សដែលមានទ្រង់ទ្រាយធំបំផុត វិសាលភាពគ្របដណ្តប់ទូលំទូលាយបំផុត និងមានតម្រូវការខាងសមត្ថភាពខ្ពស់បំផុតរបស់ចិន ប្រព័ន្ធ BeiDou មានគោលដៅផ្តល់សេវាកម្មនៅទូទាំងពិភពលោកនិងផ្តល់ផលប្រយោជន៍ដល់មនុស្សជាតិ ហើយរួមចំណែកជា “ផែនការប្រទេសចិន”ដល់ការអភិវឌ្ឍនៃការផ្កាយរណបណែនាំផ្លូវលើពិភពលោក ។ យើងសកម្មធ្វើកិច្ចសហប្រតិបត្តិការនិងការផ្លាស់ប្តូរអន្តរជាតិ ចែករំលែកសមិទ្ធផលអភិវឌ្ឍនៃប្រព័ន្ធ BeiDou របស់ចិនជាមួយនិងអន្តរជាតិ ។ បច្ចុប្បន្ននេះ មានប្រទេសលើសពី៥០ភាគរយលើពិភពលោកបានប្រើប្រាស់ប្រព័ន្ធ BeiDou របស់ចិនក្នុងក្របខ័ណ្ឌទូទាំងពិភពលោក ។
លោកនៅបានថ្លែងទៀតថា ប្រព័ន្ធ BeiDou ត្រូវបានប្រើប្រាស់ក្នុងវិស័យនានាដូចជា គមនាគមន៍ដឹកជញ្ជូន កសិកម្មនិងរបរនេសាទ និងការកាត់បន្ថយនិងជួយការងារសង្គ្រោះក្នុងគ្រោះមហន្តរាយជាដើម ហើយក៏បានដើរតួនាទីយ៉ាងសកម្មក្នុងការបង្ការនិងគ្រប់គ្រងជំងឺកូវីដ១៩ផងដែរ ។
