ទន្ទឹមនឹងពេលដែលការរីករាលដាលនៃជំងឺកូវីដ ១៩ នៅសហរដ្ឋអាមេរិកមានសភាពកាន់តែធ្ងន់ធ្ងរ សមាជិករដ្ឋសភាអាមេរិកមួយចំនួនបានលើកយកការពិភាក្សាជាច្រើនពាក់ព័ន្ធនឹងប្រទេសចិនស្តីពីជំងឺកូវីដ ១៩ ។ ទាក់ទិននឹងករណីនេះ លោក ZhangYesui អ្នកនាំពាក្យកិច្ចប្រជុំលើកទី ៣ នៃមហាសន្និបាតសភាតំណាងប្រជាជនទូទាំងប្រទេសចិននីតិកាលទី ១៣ បានឆ្លើយតបនឹងអ្នកយកព័ត៌មានក្នុងសន្និសីទកាសែតកាលពីយប់ថ្ងៃទី ២១ ខែឧសភាថា ប្រទេសចិនមិនទទួលយកការមួលបង្កាច់និងការវាយប្រហារជាដាច់ខាត ។
លោក ZhangYesui បានថ្លែងថា ការចោទប្រកាន់ទាំងនេះគឺគ្មានភស្តុតាងជាក់ស្តែងអ្វីទាល់តែសោះ ថែមទាំងបានល្មើសច្បាប់អន្តរជាតិនិងក្រម មូលដ្ឋាននៃទំនាក់ទំនងអន្តរជាតិទៀតផង ។ បន្ទាប់ពីការផ្ទុះជំងឺកូវីដ ១៩ មក ប្រទេសចិនបានប្រកាន់អាកប្បករិយាទទួលខុសត្រូវប្រកបដោយតម្លាភាពនិងបើកទូលាយ ដោយបានរាយការណ៍ពីព័ត៌មានស្តីពីការរីករាលដាលនៃជំងឺកូវីដ ១៩ ជូនចំពោះអង្គការសុខភាពពិភពលោកនិងប្រទេសពាក់ព័ន្ធនានា បានប្រកាសព័ត៌មានស្តីពីលំដាប់ហ្សែននៃវីរុសជាបន្ទាន់ ព្រមទាំងខិតខំប្រឹងប្រែងអស់ពីលទ្ធភាពដើម្បីធ្វើកិច្ចសហប្រតិបត្តិការអន្តជាតិក្នុងការប្រយុទ្ធប្រឆាំងនឹងជំងឺកូវីដ ១៩ ហេតុនេះហើយទទួលបានការកោតសរសើរជាទូទៅពីសំណាក់សហគមន៍អន្តរជាតិ ។ រឿងទាំងនេះវាជាការពិតជាក់ស្តែង ។ យើងមិនអាចទទួលយកឡើយនូវការមួលបង្កាច់និងការវាយប្រហារជាដាច់ខាត ។
លោក ZhangYesui បានបញ្ជាក់ថា បញ្ហាប្រភពដើមនៃវីរុសជាបញ្ហាវិទ្យាសាស្ត្រ ដូច្នេះត្រូវទុកឱ្យអ្នកវិទ្យាសាស្ត្រនិងអ្នកជំនាញវេជ្ជសាស្ត្រជាអ្នកធ្វើការសិក្សាស្រាវជ្រាវតាមបែបវិទ្យាសាស្ត្រ ។ ការទម្លាក់កំហុសឱ្យអ្នកដទៃដើម្បីច្រានចោលទំនួសខុសត្រូវរបស់ខ្លួន គឺគ្មានទំនួសខុសត្រូវនិងគ្មានគុណធម៌ ។ ដូច្នេះ យើងមិនទទួលយកការប្តឹងនិងទារសំណងអ្វីទាំងអស់ជាដាច់ខាត ។
លោក ZhangYesui បានថ្លែងថា វីរុសជាសត្រូវរួមរបស់មនុស្សជាតិ ។ ការយកឈ្នះលើជំងឺឆ្លងត្រូវការវិទ្យាសាស្រ្ត វិចារណញ្ញាណ ការរួមសាមគ្គីគ្នានិងកិច្ចសហប្រតិបត្តិការ ។