កាលពីរសៀលថ្ងៃទី២១ខែឧសភា សកម្មភាពយកបទសម្ភាសន៍លើកទី១ជាមួយសមាជិកសភាប្រឹក្សានយោបាយប្រជាជននៃកិច្ចប្រជុំលើកទី៣នៃមហាសន្និបាតសភាប្រឹក្សានយោបាយប្រជាជនទូទាំងប្រទេសចិននីតិកាលទី១៣បានប្រារព្ធធ្វើនៅវិមានសភាប្រជាជនចិន ។
លោកWangchen សមាជិកអចិន្ត្រៃយ៍នៃសភាប្រឹក្សានយោបាយប្រជាជនទូទាំងប្រទេស អនុប្រធានវិទ្យាស្ថានវិស្វកម្មចិននិងជាប្រធានបណ្ឌិត្យសភាវេជ្ជសាស្ត្រចិនដែលធ្លាប់ទៅចូលរួមការប្រយុទ្ធប្រឆាំងជំងឺកូវីដ១៩នៅក្រុងវូហានបានថ្លែងថា យើងត្រូវតែពង្រឹងវិស័យអប់រំផ្នែកវេជ្ជសាស្ត្រថែមទៀត ។ យើងគួរតែមានយន្តការពិតប្រាកដដែលអាចទាក់ទាញធនធានមនុស្សដ៏ឆ្នើមមកធ្វើជាគ្រូពេទ្យ ហើយគួរតែមានប្រព័ន្ធអប់រំដ៏ល្អប្រសើរមកបណ្តុះបណ្តាលធនធានមនុស្សទាំងនេះ ។ មួយទៀតគឺការស្រាវជ្រាវខាងវេជ្ជសាស្ត្រ ។ ខ្ញុំគិតថា គួរតែបង្កើតស្ថាប័នស្រាវជ្រាវខាងវេជ្ជសាស្ត្រថ្នាក់ជាតិមួយដែលអាចណែនាំនិងសម្របសម្រួលរចនាសម្ព័ន្ធខាងសិក្សាស្រាវជ្រាវវេជ្ជសាស្ត្រនៃប្រទេស ។ ម្យ៉ាងទៀតត្រូវតែយកចិត្តទុកដាក់ការគួបផ្សំគ្នារវាងការបង្ការនិងការព្យាបាល ។ មានតែផ្នែកទាំងពីរនេះរួមបញ្ចូលគ្នា ទើបអាចទប់ទល់យ៉ាងខ្លាំងក្លាជាមួយបញ្ហាប្រឈមធំៗបាន ៕