កាលពីយប់ថ្ងៃទី២០ខែឧសភា លោកស៊ីជីនភីង ប្រធានរដ្ឋចិនបានពិភាក្សាការងារតាមទូរស័ព្ទជាមួយលោកWin Myint ប្រធានាធិបតីមីយ៉ាន់ម៉ានិងលោកស្រីSheikh Hasina នាយករដ្ឋមន្ត្រីបង់ក្លាដែស ។
ថ្លែងក្នុងជំនួបជាមួយ លោកWin Myint លោកស៊ីជីនភីងបានលើកឡើងថា ប្រទេសចិនរីករាយរួមសហការជាមួយសហគមន៍អន្តរជាតិបូករួមទាំងមីយ៉ាន់ម៉ាផង បន្តគាំទ្រតួនាទីដឹកនាំរបស់អង្គការសុខភាពពិភពលោក គាំពារយ៉ាងម៉ឺងម៉ាត់នូវយុត្តិធម៌អន្តរជាតិនិងក្រមមូលដ្ឋាននៃទំនាក់ទំនងអន្តរជាតិ ចាប់ដៃគ្នាយកជ័យជម្នះក្នុងសង្គ្រាមប្រយុទ្ធប្រឆាំងនឹងជំងឺកូវីដ១៩ដើម្បីការពារសុខាភិបាលសាធារណៈពិភពលោក ។
លោកWin Myint ថ្លែងថា នៅក្រោមការដឹកនាំដ៏មុតមាំរបស់លោកស៊ីជីនភីង រដ្ឋាភិបាលនិងប្រជាជនចិនបានទប់ស្កាត់ការរីករាលដាលនៃជំងឺកូវីដ១៩យ៉ាងមានប្រសិទ្ធភាព ជីវភាពផ្នែកសេដ្ឋកិច្ចនិងសង្គមចិនបានស្តារឡើងវិញដោយគ្រប់ជ្រុងជ្រោយ ភាគីមីយ៉ាន់ម៉ាសប្បាយរីករាយចំពោះប្រការនេះ ។ ភាគីមីយ៉ាន់ម៉ាសូមថ្លែងអំណរគុណដល់ប្រទេសចិនដែលបានផ្តល់ការគាំទ្រនិងជំនួយឧបត្ថម្ភចំពោះអង្គការសុខភាពពិភពលោកនិងប្រទេសដទៃទៀត ក្នុងនោះបូករួមទាំងមីយ៉ាន់ម៉ាផងក្នុងការប្រយុទ្ធប្រឆាំងនឹងជំងឺកូវីដ១៩ ។ នៅចំពោះមុខជំងឺកូវីដ១៩ ប្រទេសនានាគួរតែបង្កើនកិច្ចសហប្រតិបត្តិការគ្នា ដើម្បីគាំពារយុត្តិធម៌អន្តរជាតិនិងសិទ្ធិអភិវឌ្ឍន៍នៃប្រទេសនីមួយៗ ។
ថ្លែងក្នុងជំនួបជាមួយលោកស្រីSheikh Hasina លោកស៊ីជីនភីងបានលើកឡើងថា ភាគីចិនប្រឆាំងទង្វើដែលរំខានកិច្ចសហប្រតិបត្តិការអន្តរជាតិនិងបំផ្លាញកិច្ចខិតខំប្រឹងប្រែងនៃពិភពលោកជាពិសេសគឺកិច្ចខិតខំប្រឹងប្រែងរបស់ប្រទេសកំពុងអភិវឌ្ឍក្នុងការប្រយុទ្ធប្រឆាំងនឹងជំងឺកូវីដ១៩ ។ ប្រទេសចិនរីករាយរួមសហការជាមួយសហគមន៍អន្តរជាតិដែលបូករួមទាំងបង់ក្លាដែសផង គាំទ្រតួនាទីដឹកនាំរបស់អង្គការសុខភាពពិភពលោក ជំរុញកិច្ចសហប្រតិបត្តិការបង្ការនិងគ្រប់គ្រងជំងឺឆ្លង គាំពារសន្តិសុខសុខាភិបាលសាធារណៈនៃពិភពលោក ។
លោកស្រីSheikh Hasinaថ្លែងថា ជំងឺកូវីដ១៩គឺជាបញ្ហាប្រឈមជាសកល បណ្តាប្រទេសនានាគួរតែរួមគ្នាទប់ទល់ ។ ភាគីបង់ក្លាដែសរីករាយរួមជាមួយប្រទេសចិនក្នុងការកសាងគំនិតផ្តួចផ្តើមខ្សែក្រវាត់និងផ្លូវ ជំរុញទំនាក់ទំនងដៃគូសហប្រតិបត្តិការជាយុទ្ធសាស្ត្ររវាងចិននិងបង់ក្លាដែសឱ្យអភិវឌ្ឍទៅមុខឥតឈប់ឈរ ៕