កិច្ចប្រជុំប្រចាំឆ្នាំនៃស្ថាប័នប្រឹក្សានយោបាយកំពូលនៃប្រទេសចិនបានបើកធ្វើនៅក្រុងប៉េកាំងនាថ្ងៃទី២១ខែឧសភា ក្រោមអធិបតីភាពថ្នាក់ដឹកនាំបក្សនិងរដ្ឋចិនមានដូចជាអគ្គលេខាធិការបក្សលោកស៊ីជីនភីងជាដើម។
ដោយសាររងឥទ្ធិពលពីករណីជំងឺកូវីដ១៩ កិច្ចប្រជុំប្រចាំឆ្នាំនៃសភាប្រឹក្សានយោបាយប្រជាជនចិនដែលត្រូវបើកធ្វើនៅថ្ងៃទី៣ខែមីនារៀងរាល់ឆ្នាំចាប់ពីឆ្នាំ១៩៩៨មកត្រូវបានពន្យារពេលមកបើកធ្វើក្នុងត្រីមាសទី២ជាលើកដំបូងក្នុងរយៈពេល២២ឆ្នាំ។ជាកិច្ចចាប់ផ្តើម ថ្នាក់ដឹកនាំបក្សនិងរដ្ឋចិនមានដូចជាលោកស៊ីជីនភីងជាដើមនិងសមាជិកសភាប្រឹក្សានយោបាយប្រជាជនទូទាំងប្រទេសដែលវត្តមានក្នុងកិច្ចប្រជុំបានឈរស្មឹងស្មាធិ៍ដើម្បីគោរពវិញ្ញាណក្ខន្ធវីរជនបានពលីជីវិតនិងបងប្អូនរួមជាតិដែលបានស្លាប់ដោយករណីជំងឺកូវីដ១៩។
កិច្ចប្រជុំនៃមហាសន្និបាតលើកនេះមានរយៈពេល៧ថ្ងៃដែលមានសមាជិកសភាប្រឹក្សានយោបាយប្រជាជនទូទាំងប្រទេសចំនួនជាង២ពាន់នាក់មកពីគ្រប់គណបក្ស គ្រប់ជនជាតិនិងគ្រប់មជ្ឈដ្ឋាននឹងពិនិត្យពិភាក្សារបាយការណ៍ការងារនៃគណៈកម្មាធិការអចិន្ត្រៃយ៍នៃសភាប្រឹក្សានយោបាយប្រជាជនទូទាំងប្រទេសនិងស្តាប់និងពិគ្រោះពិភាក្សាអំពីរបាយការណ៍ការងាររដ្ឋាភិបាល ដើម្បីលើកជាសំណើនិងមតិយោបល់ជុំវិញគោលការណ៍ណែនាំខាងនយោបាយដែលពាក់ព័ន្ធនឹងការអភិវឌ្ឍសេដ្ឋកិច្ចនិងសង្គមកិច្ចជាតិ។