ថ្ងៃទី ១៣ ខែឧសភា នៅក្រុងប៉េកាំង លោកZhao Lijian អ្នកនាំពាក្យក្រសួងការបរទេសចិនបានថ្លែងថា ប្រទេសចិនរីករាយបន្តរួមសហការជាមួយប្រទេសកាណាដានិងសហគមន៍អន្តរជាតិក្នុងការពន្លឿនការសិក្សាស្រាវជ្រាវនិងផលិតសម្ភារៈវេជ្ជសាស្រ្តសម្រាប់ប្រយុទ្ធប្រឆាំងនឹងជំងឺCOVID-19 ដើម្បីធ្វើកិច្ចខិតខំប្រឹងប្រែងក្នុងការគាំពារសន្តិសុខសុខាភិបាលជាសកលនិងការប្រយុទ្ធប្រឆាំងនឹងជំងឺឆ្លង ។
សូមបញ្ជាក់ថា តាមការផ្សាយដំណឹងឱ្យដឹងថា ថ្ងៃទី ១២ ខែឧសភា គណៈកម្មាធិការសិក្សាស្រាវជ្រាវជាតិកាណាដាបានបង្ហាញថា ប្រទេសកាណាដានិងចិនបាននិងកំពុងធ្វើកិច្ចសហប្រតិបត្តិការជាមួយក្រុមហ៊ុនជីវសាស្រ្តKangxinuoចិន ដើម្បីក្រាលផ្លូវសម្រាប់ការធ្វើពិសោធន៍ខាងវ៉ាក់សាំងនៅកាណាដានាពេលអនាគត ។ ពេលឆ្លើយតបនឹងសំណួរពាក់ព័ន្ធក្នុងសន្និសីទកាសែតជាប្រចាំកាលពីថ្ងៃដដែល លោកZhao Lijianបានចង្អុលបង្ហាញថា ការសិក្សាស្រាវជ្រាវវ៉ាក់សាំងមានសារៈសំខាន់ណាស់ក្នុងការបង្ការនិងគ្រប់គ្រងជំងឺឆ្លង ដែលវាជាគន្លឹះសម្រាប់មនុស្សជាតិយកជ័យជម្នះលើជំងឺឆ្លង ។ ភាគីចិនបាននិងកំពុងធ្វើកិច្ចសហប្រតិបត្តិការអន្តរជាតិយ៉ាងសកម្មផ្នែកសិក្សាស្រាវជ្រាវថ្នាំព្យាបាលនិងវ៉ាក់សាំងជាមួយបណ្តាប្រទេសក៏ដូចជាកាណាដាផងដែរ ៕