ថ្ងៃទី២៩ខែមេសា តាមម៉ោងក្នុងតំបន់ លោកPompeoរដ្ឋមន្រ្តីការបរទេសអាមេរិកបានបន្តុះបង្អាប់អង្គការសុខភាពពិភពលោកម្តងទៀតថាបរាជ័យក្នុងភារកិច្ចបង្ការនិងគ្រប់គ្រងជំងឺឆ្លង ព្រមទាំងបានគំរាមកំហែងថា នឹងធ្វើការស៊ើបអង្កេតចំពោះអង្គការនេះដោយសារអង្គការនេះមិនបានចាយវាយលុយរបស់អ្នកបង់ពន្ធអាមេរិកឱ្យបានត្រឹមត្រូវ។
ក្នុងនាមជាស្ថាប័នពហុភាគីដ៏សំខាន់បំផុតលើវិស័យសុខាភិបាលសាធារណៈជាសកល ចាប់ពីបានផ្ទុះឡើងករណីជំងឺឆ្លងមក អង្គការសុខភាពពិភពលោកបានបំពេញភារកិច្ចរបស់ខ្លួនយ៉ាងជំនាញ ប្រាកដប្រជានិងប្រកបដោយប្រសិទ្ធភាពដែលបានដើរតួនាទីមិនអាចជំនួសបាន ដោយទទួលបានការកោតសរសើរយ៉ាងទូលំទូលាយពីសំណាក់សហគមន៍អន្តរជាតិ។ ពីរថ្ងៃបន្ទាប់ពីទទួលបានការជូនដំណឹងរបស់ភាគីចិនជាផ្លូវការកាលពីថ្ងៃទី៣ខែមករា អង្គការសុខភាពពិភពលោកក៏ចេញការព្រមានចំពោះពិភពលោកទាំងមូលអំពីករណីជំងឺរលាកសួតបង្កឡើងដោយមូលហេតុមិនច្បាស់ ព្រមទាំងបានជូនដំណឹងតាមរយៈសន្និសីទទូរស័ព្ទតាមពេលកំណត់អំពីសភាពការណ៍ជំងឺឆ្លងទៅកាន់មន្រ្តីទទួលបន្ទុកផ្នែកសុខាភិបាលសាធារណៈនៃបណ្តាប្រទេសនានា ក្នុងនោះបូករួមទាំងអាមេរិកផងចាប់ពីថ្ងៃទី៧ខែមករាមក។នៅខែកុម្ភៈ អង្គការសុខភាពពិភពលោកបានចាត់បញ្ជូនក្រុមអ្នកជំនាញអន្តរជាតិ បូករួមទាំងអ្នកជំនាញអាមេរិក២រូបផងឱ្យទៅត្រួតពិនិត្យនិងសិក្សាពីស្ថានភាពជំងឺឆ្លងនៅប្រទេសចិន។
វាច្បាស់ណាស់ថា ភាគីអាមេរិកអាចទទួលបានព័ត៌មានពីអង្គការសុខភាពពិភពលោកយ៉ាងរលូន ការពិតជាក់ស្តែងបានបញ្ជាក់ថា លោកPompeoធ្វើបែបនេះគឺដើម្បីច្រានចោលទំនួលខុសត្រូវរបស់រដ្ឋាភិបាលអាមេរិកដែលបរាជ័យក្នុងការប្រយុទ្ធប្រឆាំងនឹងជំងឺឆ្លង ប្រការនេះកាន់តែលាតត្រដាងនូវធាតុពិតរបស់លោកPompeoដែលបានប្រមាថមើលងាយនិងរំលោភបំពានអង្គការអន្តរជាតិនិងច្បាប់អន្តរជាតិ ក៏ដូចជាអនុវត្តនយោបាយឯកតោភាគីនិយមតាមតែទំនើងចិត្តផងដែរ ៕
