ក្នុងប្រវត្តិសាស្រ្តរបស់អាមេរិក មិនធ្លាប់មានរដ្ឋមន្រ្តីការបរទេសដូចលោក Mike Pompeo ដែលបានប្រកាន់ឥរិយាបថការងារបែបនិយាយកុហក បោកបញ្ឆោត លួចស៊ើបការណ៍របស់ទីភ្នាក់ងារស៊ើបការណ៍មជ្ឈិមអាមេរិកទៅអនុវត្តក្នុងកិច្ចការទូតអាមេរិកនោះឡើយ ជាហេតុបានធ្វើឱ្យប៉ះពាល់កេរិ៍្តឈ្មោះរបស់អាមេរិក ហើយទំង្វើរបស់លោកបែបនេះក៏បានប្រាសចាកពីសារជាតិរបស់មនុស្សផងដែរ ។
មុននេះមិនយូរប៉ុន្មាន លោក Kurt Campbell អតីតឧបការីនៃរដ្ឋមន្រ្តីការបរទេសអាមេរិកដែលទទួលបន្ទុកកិច្ចការអាស៊ីប៉ាស៊ីហ្វីកនៅក្រសួងការបរទេសអាមេរិក និងលោក Rush Doshi អ្នកសិក្សាស្រាវជ្រាវជាន់ខ្ពស់នៃមជ្ឈមណ្ឌលចិននៃសកលវិទ្យាល័យYale បានចុះផ្សាយអត្ថបទលើទស្សនាវដ្តី« Foreign Affairs »ថា ដោយសារភាពទន់ខ្សោយក្នុងការផ្គត់ផ្គង់ផលិតផលសាធារណៈជាសកល ក៏ដូចជាភាពទន់ខ្សោយខាងសមត្ថភាពនិងឆន្ទៈក្នុងការរៀបចំនិងសម្របសម្រួលការងារទប់ទល់នឹងវិបត្តិជាសកលជាដើម ខណៈពេលប្រឈមនឹងការរីករាលដាលនៃជំងឺCOVID-19 ការអនុវត្តរបស់ក្រុងវ៉ាស៊ីនតោនមិនបានធ្វើឱ្យប្រជាជនពេញចិត្តទេ ។ ទាក់ទិននឹងរឿងនេះ លោក Mike Pompeo ដែលជាមន្រ្តីការទូតឋានៈទីមួយរបស់អាមេរិកត្រូវតែទទួលខុសត្រូវ ។
ជាបឋម លោក Mike Pompeo បានជំរុញឱ្យរដ្ឋាភិបាលឈប់ផ្កល់ថវិកាដល់អង្គការសុខភាពពិភពលោក វាបានប៉ះពាល់ដល់ការប្រយុទ្ធប្រឆាំងនឹងជំងឺឆ្លង ជាពិសេសគឺប៉ះពាល់យ៉ាងខ្លាំងដល់ផលប្រយោជន៍របស់ប្រទេសមិនរីកលូតលាស់បំផុតនិងក្រុមមនុស្សងាយរងគ្រោះក្នុងការទប់ទល់នឹងជំងឺឆ្លង ។
ទីពីរ ដើម្បីបិទបាំងភាពអសមត្ថភាពរបស់រដ្ឋាភិបាលអាមេរិកក្នុងការងារទប់ទល់នឹងជំងឺឆ្លង លោក Pompeo បានទម្លាក់កំហុសទៅកាន់ប្រទេសចិនជាបន្តបន្ទាប់ ក្នុងចេតនាញុះញង់ឱ្យមានការស្អប់ខ្ពើមនិងបដិបក្ខគ្នា ព្រមទាំងបានបំផ្លិចបំផ្លាញម្តងហើយម្តងទៀតនូវការខិតខំប្រឹងប្រែងនៃកិច្ចសហប្រតិបតិ្តការអន្តរជាតិក្នុងការបង្ការជំងឺឆ្លង ។
ទីបី ករណីជំងឺឆ្លងបានបង្កផលប៉ះពាល់ដល់មនុស្សជាតិហើយ ប៉ុន្តែ ក្រោមការជំរុញពីលោក Pompeo រដ្ឋាភិបាលអាមេរិកបានបន្តដាក់សម្ពាធអតិបរមានជាបន្តទៀតទៅលើប្រទេសអ៊ីរ៉ង់និងគុយបាជាដើម បានបណ្តាលឱ្យកើតមានគ្រោះមហន្តរាយមនុស្សធម៌កាន់តែធ្ងន់ធ្ងរ ។
ទីបួន ក្នុងការងារបង្ការនិងគ្រប់គ្រងជំងឺឆ្លងរបស់ប្រទេសអាមេរិក លោក Pompeo ត្រឹមតែឱបដៃឈរមើលមិនមានសកម្មភាពអ្វីទេ លោកមិនអើពើពីអាយុជីវិតរបស់ប្រជាជន ស្វែងរកតែផលប្រយោជន៍ផ្ទាល់ខ្លួនប៉ុណ្ណោះ ។
ហេតុការណ៍ជំងឺកូវីដ១៩ ជាវិបត្តិធ្ងន់ធ្ងរបំផុតតាំងពីបញ្ចប់សង្គ្រាមលោកលើកទីពីរមក សុវត្ថិភាពអាយុជីវិតមនុស្សរាប់ពាន់រាប់ម៉ឺននាក់ត្រូវរងការគំរាមកំហែង ។ ប៉ុន្តែ សភាពការណ៍បែបនេះ មិនបានធ្វើឱ្យលោកមានទំនួលខុសត្រូវសម្បីតែបន្តិច ថែមទាំងបានក្លាយជាឱកាសរបស់លោក ដែលបានខំប្រឹងប្រែងដើរតួសម្តែង ដើម្បីផ្គាប់ចិត្តកម្លាំងអភិរក្សក្នុងស្រុក ក៏ដូចជាប្រមែប្រមូលធនធាននយោបាយរបស់ខ្លួន ។ ទង្វើរបស់លោក Pompeo មិនគ្រាន់តែធ្វើឱ្យប្រជាជនអាមេរិកបាត់បង់ជំនឿចិត្ត បង្ខូចកេរ្តិ៍ឈ្មោះកិច្ចការទូតរបស់អាមេរិកប៉ុណ្ណោះទេ ថែមទាំងនឹងនាំមកនូវផលប៉ះពាល់ដល់កិច្ចសហប្រតិបតិ្តការជាសកលក្នុងការប្រយុទ្ធប្រឆាំងនឹងជំងឺឆ្លងទៀតផង ដែលនឹងក្លាយជារឿងអាម៉ាស់និងសោកនាដកម្មរបស់អាមេរិកទៀតផង ។ កំហុសរបស់លោក Pompeoមិនអាចគេចវេះទេ គួរតែទទួលជំនុំជម្រះពីប្រជាជនអាមេរិកនិងសហគមន៍អន្តរជាតិ ៕
