កាលពីយប់ថ្ងៃទី ១៣ ខែកុម្ភៈ លោក ស៊ីជីនភីង ប្រធានរដ្ឋចិនបានសន្ទនាតាមទូរសព្ទជាមួយលោក Mahathir Bin Mohamad នាយករដ្ឋមន្រ្តីម៉ាឡេស៊ី។លោក ស៊ីជីនភីង បានចង្អុលបង្ហាញថា ប្រទេសចិននិងម៉ាឡេស៊ីគួរតែបន្តធ្វើឱ្យស៊ីជម្រៅនូវទំនាក់ទំនងរវាងប្រទេសទាំងពីរ។ជាពិសេស គឺ រួមគ្នាកសាងគំនិតផ្តួចផ្តើម"ខ្សែក្រវាត់និងផ្លូវ"ខណៈពួតដៃគ្នាប្រយុទ្ធប្រឆាំងនឹងបញ្ហាប្រឈមនៃការរីករាលដាលនៃជំងឺ Covid-19 ក៏ដូចជាបង្កើតនូវលទ្ធផលនៃកិច្ចសហប្រតិបត្តិការបន្ថែមទៀតដើម្បីផ្តល់ផលប្រយោជន៍ដល់ប្រទេសទាំងពីរនិងប្រជាជននៃប្រទេសទាំងពីរ។
លោក ស៊ីជីនភីង បានសង្កត់ធ្ងន់ថា ចាប់តាំងពីផ្ទុះនូវជំងឺ Covid-19 រដ្ឋាភិបាលចិនបានចាត់វិធានការបង្ការនិងគ្រប់គ្រងដោយគ្រប់ជ្រុងជ្រោយបំផុតនិងយ៉ាងម៉ឺងម៉ាត់បំផុត ហើយទទួលបាននូវលទ្ធផលជាវិជ្ជមាន។រដ្ឋាភិបាលចិននឹងដឹកនាំប្រជាជនចិនឱ្យយកជ័យជម្នះលើសង្រ្គាមប្រយុទ្ធប្រឆាំងនឹងការរីករាលដាលនៃជំងឺ Covid-19 និងរក្សានូវនិន្នាការអភិវឌ្ឍន៍សេដ្ឋកិច្ចប្រទេសចិនដើម្បីសម្រេចឱ្យបាននូវគោលដៅអភិវឌ្ឍន៍នៅឆ្នាំនេះ។
លោក ស៊ីជីនភីង បានចង្អុលបង្ហាញថា ប្រទេសចិននឹងបន្តពង្រឹងកិច្ចសហប្រតិបត្តិការបង្ការនិងគ្រប់គ្រងជំងឺជាមួយបណ្តាប្រទេសអាស៊ាន រួមមានប្រទេសម៉ាឡេស៊ីដោយប្រកាន់ខ្ជាប់នូវអាកប្បកិរិយាបើកទូលាយនិងតម្លាភាពដើម្បីរួមគ្នាគាំពារសុវត្ថិភាពសុខភាពសាធារណៈក្នុងតំបន់។
លោក Mahathir Bin Mohamad បានថែ្លងថា ប្រទេសម៉ាឡេស៊ីសូមសម្តែងការកោតសរសើរចំពោះកិច្ចខិតខំប្រឹងប្រែងដ៏ធំធេងរបស់ចិននិងវឌ្ឍនភាពវិជ្ជមានក្នុងការទប់ស្កាត់នឹងការរីករាលដាលនៃជំងឺនេះ។ ហើយសម្គាល់ថា នេះគឺជាការចូលរួមចំណែករបស់ចិនក្នុងនាមជាប្រទេសធំដែលមានទំនួលខុសត្រូវក្នុងការគាំពារសុវត្ថិភាពសុខភាពសាធារណៈពិភពលោក។ក្នុងនាមជាមិត្តដ៏ស្មោះត្រង់របស់ចិន ប្រទេសម៉ាឡេស៊ីបានផ្តល់នូវសម្ភារៈផែ្នកវេជ្ជសាស្ត្រមួយចំនួនដល់ប្រទេសចិនរួចមកហើយ ហើយមានឆន្ទៈបន្តផ្តល់ជំនួយដល់ប្រទេសចិនបន្ថែមទៀត។ម៉ាឡេស៊ីជឿជាក់ថា ក្រោមការដឹកនាំរបស់លោកប្រធានរដ្ឋចិន ស៊ីជីនភីង ប្រជាជនចិនប្រាកដជានឹងយកជ័យជម្នះលើសង្រ្គាមប្រយុទ្ធប្រឆាំងនឹងការរីករាលដាលនៃជំងឺនេះមិនខាន ហើយការអភិវឌ្ឍរបស់ប្រទេសចិននឹងវិលមករកភាពប្រក្រតីឡើងវិញ។ប្រទេសម៉ាឡេស៊ីវាយតម្លៃខ្ពស់ចំពោះការចូលរួមចំណែករយៈពេលវែងរបស់ប្រទេសចិនក្នុងការជំរុញការអភិវឌ្ឍរបស់ប្រទេសម៉ាឡេស៊ីនិងមានឆន្ទៈធ្វើឱ្យស៊ីជម្រៅនូវកិច្ចសហប្រតិបត្តិការជាក់ស្តែងជាមួយប្រទេសចិនដើម្បីជំរុញទំនាក់ទំនងមិត្តភាពរវាងប្រទេសទាំងពីរ៕
