កាលពីថ្ងៃទី ១៣ ខែកុម្ភៈ លោកស្រីMaria Zakharova អ្នកនាំពាក្យក្រសួងការបរទេស រុស្ស៊ីបានថ្លែងថា ភាគីរុស្ស៊ី ស្នើបើកធ្វើជំនួបសន្ទនា៤ភាគី អំពីបញ្ហាមជ្ឈិមបូព៌ា ឱ្យបានកាន់តែឆាប់ ។
ថ្ងៃដដែល លោកស្រីMaria Zakharova បានតំណាងឱ្យក្រសួងការបរទេសរុស្ស៊ី ធ្វើការវាយតម្លៃអំពីបញ្ហាមជ្ឈិមបូព៌ាថា ការសម្រេចបាននូវសន្តិភាព ដែលជាទីអវសាន នៅមជ្ឈិមបូព៌ា គឺត្រូវការកិច្ចខិតខំប្រឹងប្រែងរួមគ្នានៃសហគមន៍អន្តរជាតិ ។ ការបើកធ្វើជំនួបសន្ទនា៤ភាគីអំពីបញ្ហាមជ្ឈិមបូព៌ា ដែលរួមមាន អង្គការសហប្រជាជាតិ សហភាពអឺរ៉ុប រុស្ស៊ីនិង អាមេរិក គឺជាយន្តការដ៏មានប្រសិទ្ធភាព សម្រាប់សម្រេចបាននូវដំណើរការសន្តិភាពនៅតំបន់មជ្ឈិមបូព៌ា ។ ស្ថិតក្នុងបរិបទនៃការកើនឡើងភាពតានតឹង នៅប៉ាឡេស្ទីននិងអ៊ីស្រាអែលនាពេលបច្ចុប្បន្ននេះ ប្រទេសរុស្ស៊ី សូមស្នើបើកធ្វើជំនួបសន្ទនា៤ភាគី អំពីបញ្ហាមជ្ឈិមបូព៌ា ឱ្យបានកាន់តែឆាប់ ៕
