លោក Mark Esper រដ្ឋមន្រ្តីក្រសួងការពារជាតិសហរដ្ឋអាមេរិកបានថែ្លងកាលពីថ្ងៃទី ១៣ ខែកុម្ភៈ នៅទីក្រុងប្រ៊ុចសែល រដ្ឋធានីនៃប្រទេសបែលហ្ស៊ិកថា កិច្ចចរចាសន្តិភាពរវាងអាមេរិកនិងអង្គការតាលីបង់ដែលជាកម្លាំងប្រដាប់អាវុធប្រឆាំងនឹងរដ្ឋាភិបាលអាហ្វហ្គានីស្ថានបានទទួលការរីកចម្រើន ហើយភាគីទាំងសងខាងមានឆន្ទៈកាត់បន្ថយអំពើហិង្សានៅសប្តាហ៍ក្រោយ។
លោក Mark Esper បានថែ្លងថា ការដើរដល់កិច្ចព្រមព្រៀងស្តីពីបទឈប់បាញ់គ្នាតាមរយៈមធ្យោបាយនយោបាយ គឺជាជម្រើសដ៏ល្អបំផុតសម្រាប់ដោះស្រាយជម្លោះនៅអាហ្វហ្គានីស្ថាន ហើយព័ត៌មានកាន់តែច្រើនទៀតនឹងត្រូវប្រកាសក្នុងពេលឆាប់ៗ។
លោក Jens Stoltenberg អគ្គលេខាធិការអង្គការណាតូបានប្រាប់ប្រព័ន្ធសារព័ត៌មានថា ក្នុងកិច្ចប្រជុំដែលមានរយៈពេល២ ថ្ងៃ រដ្ឋមន្រ្តីក្រសួងការពារជាតិនៃបណ្តាប្រទេសដែលជាសមាជិកអង្គការណាតូនានាបានសម្តែងការគាំទ្រជាឯកច្ឆន្ទចំពោះកិច្ចចរចាសន្តិភាពនៅអាហ្វហ្គានីស្ថានព្រមទាំងសម្តែងការស្វាគមន៍ចំពោះកិច្ចខិតខំប្រឹងប្រែងដើម្បីកាត់បន្ថយអំពើហិង្សា៕
