លោក លី ខឹឈាំង នាយករដ្ឋមន្ត្រីចិន និងជាប្រធានក្រុមការងារដឹកនាំកិច្ចការងារទប់ទល់នឹងការរាតត្បាតនៃជំងឺរលាកសួតប្រភេទថ្មីបង្កដោយវីរុសកូរ៉ូណានៃគណៈកម្មាធិការមជ្ឈិមបក្សកុម្មុយនិស្តចិន បានទៅដល់មជ្ឈមណ្ឌលគ្រប់គ្រងជំងឺជាតិចិនកាលពីថ្ងៃទី ៣០ ខែមករា ដើម្បីត្រួតពិនិត្យពីស្ថានភាពនៃការស្រាវជ្រាវវេជ្ជសាស្ត្រលើការបង្ការនិងគ្រប់គ្រងការរាតត្បាតនៃជំងឺ ព្រមទាំងស្តាប់ការរាយការណ៍និងប្រមូលមតិយោបល់និងសេចក្តីស្នើអំពីការងារបង្ការនិងគ្រប់គ្រងជំងឺពីបណ្តាអ្នកជំនាញការនិងក្រុមវេជ្ជសាស្ត្រ។
លោក លី ខឺឈាំង បានគូសបញ្ជាក់ថា ចង់យកឈ្នះលើសង្គ្រាមប្រយុទ្ធប្រឆាំង ទប់ទល់ និងគ្រប់គ្រងការរាតត្បាតនៃជំងឺ គន្លឹះសំខាន់ផ្តោតលើការលើកកម្ពស់ប្រសិទ្ធភាពការព្យាបាល កាត់បន្ថយអត្រាស្លាប់ ស្វែងរកវ៉ាក់សាំងនិងឱសថដែលមានប្រសិទ្ធភាព។ ត្រូវប្រមូលកម្លាំងមុតមាំឈានមុខ ស្រាវជ្រាវយ៉ាងស៊ីជ្រៅនៃការធ្វើរោគវិនិច្ឆ័យ ការព្យាបាលអ្នកជំងឺជាដើម ។ បូកសរុបបទពិសោធសង្គ្រោះនិងព្យាបាលដោយជោគជ័យជាបន្ទាន់ សម្របសម្រួលគម្រោងព្យាបាលជាបន្តបន្ទាប់ ហើយចែករំលែកឱ្យទាន់ពេលវេលា ត្រូវបង្កើនការណែនាំផ្នែកសង្គ្រោះនិងព្យាបាល ខិតខំប្រឹងប្រែងដើម្បីលើកកម្ពស់ប្រសិទ្ធភាពសង្គ្រោះនិងព្យាបាលករណីធ្ងន់ធ្ងរ យកឈ្នះលើជំងឺដោយផ្អែកលើបច្ចេកវិទ្យា ។
លោកបានស្នើថា ក្រោមការដឹកនាំដ៏រឹងមាំនៃមជ្ឈឹមបក្សកុម្មុយនិស្តចិន ដែលចាត់ទុកលោក ស៊ី ជីនភីង ជាស្នូល យើងគួរពង្រឹងទំនុកចិត្ត រួមសុខទួមទុក្ខគ្នា បង្ការនិងព្យាបាលជំងឺដោយបច្ចេកវិទ្យា យកជ័យជម្នះលើសង្គ្រាមប្រយុទ្ធប្រឆាំង បង្ការ និងគ្រប់គ្រងជំងឺរលាកសួតប្រភេទថ្មីបង្កដោយវីរុសកូរ៉ូណាដោយម៉ឺងម៉ាត់៕
