កាលពីរសៀលថ្ងៃទី១៧ខែមករាតាមម៉ោងក្នុងតំបន់ លោកស៊ីជីនភីងប្រធានរដ្ឋចិនបានធ្វើការសន្ទនាជាមួយលោកប្រធានាធិបតីមីយ៉ាន់ម៉ានៅទីក្រុងណៃពិដោ។ លោកស៊ីជីនភីងបានថ្លែងថា ប្រទេសមីយ៉ាន់ម៉ាជាប្រទេសទីមួយនៃដំណើរទស្សនកិច្ចនៅក្រៅប្រទេសរបស់លោកក្នុងឆ្នាំថ្មីខណៈពេលខួបគម្រប់៧០ឆ្នាំនៃការបង្កើតទំនាក់ទំនងទូតរវាងចិននិងមីយ៉ាន់ម៉ា ដែលបានបង្ហាញនូវការយកចិត្តទុកដាក់ខ្ពស់ទៅលើមិត្តភាពជាភាតរភាពវាងចិននិងមីយ៉ាន់ម៉ានិងធ្វើឱ្យស៊ីជម្រៅនូវទំនាក់ទំនងរវាងចិននិងមីយ៉ាន់ម៉ា។ លោករំពឹងបញ្ចេញព័ត៌មានចំនួន៣តាមរយៈទស្សនកិច្ចលើកនេះគឺ រដ្ឋាភិបាលនិងប្រជាជនចិនគាំទ្ររដ្ឋាភិបាលនិងប្រជាជនមីយ៉ាន់ម៉ាដើរតាមផ្លូវអភិវឌ្ឍន៍ដែលសមស្របនឹងសភាពការណ៍ជាតិខ្លួន និងជំរុញការអភិវឌ្ឍនៃប្រទេសជាតិដោយឥតឈប់ឈរ។ទី២ទំនាក់ទំនងភាពជាដៃគូកិច្ចសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងចិននិងមីយ៉ាន់ម៉ាបានមានមូលដ្ឋានយ៉ាងជ្រាលជ្រៅហើយ ការរួមគ្នាផ្តោតលើកិច្ចកសាងសហគមន៍រួមវាសនារវាងចិននិងមីយ៉ាន់ម៉ានឹងបញ្ចូលកម្លាំងចលករនិងកម្លាំងរស់រវើកថ្មីក្នុងការអភិវឌ្ឍទំនាក់ទំនងនៃប្រទេសទាំងពីរ។ ទី៣គឺប្រទេសចិនរីករាយបង្កើនកិច្ចសហប្រតិបត្តិការជាក់ស្តែងជាមួយមីយ៉ាន់ម៉ា ពន្លឿនការតភ្ជាប់គ្នារវាងគំនិតផ្តួចផ្តើមខ្សែក្រវាត់និងផ្លូវនិងយុទ្ធសាស្រ្តអភិវឌ្ឍន៍នៃមីយ៉ាន់ម៉ា ធ្វើឱ្យកិច្ចសហប្រតិបត្តិការទ្វេភាគីផ្តល់ផលប្រយោជន៍ដល់គ្នាទៅវិញទៅមកនិងទទួលសមិទ្ធផលដើម្បីអំណោយផលដល់ប្រជាជនប្រទេសទាំងពីរ។ ភាគីចិនរីករាយពួតដៃគ្នាជាមួយភាគីមីយ៉ាន់ម៉ា ដើម្បីផ្សព្វផ្សាយមិត្តភាពជាភាតរភាពប្រពៃណី រួមគ្នាគ្រោងផែនការអភិវឌ្ឍន៍ និងត្រួសត្រាយយុគសម័យថ្មីនៃទំនាក់ទំនងចិននិងមីយ៉ាន់ម៉ា ។ លោកស៊ីជីនភីងគូសបញ្ជាក់ថា ការបង្កើតសហគមន៍រួមវាសនារបស់មនុស្សជាតិ មុនដំបូងគឺចាប់ផ្តើមពីប្រទេសនៅជិតខាង ប្រកាន់ខ្ជាប់សុខាដុមរមនា សុវត្ថិភាពនិងវិបុលភាពជាមួយនឹងប្រទេសជិតខាង ។ ភាគីចិនរីករាយរួមជាមួយភាគីមីយ៉ាន់ម៉ាជំរុញការកសាងគម្រោងកិច្ចសហប្រតិបត្តិការសំខាន់ស្តីពីរបៀងសេដ្ឋកិច្ចរវាងចិននិងមីយ៉ាន់ម៉ាដោយនឹងនរក្រោមក្របខ័ណ្ឌ “ខ្សែក្រវាត់និងផ្លូវ” ផ្តល់ផលប្រយោជន៍កាន់តែច្រើនដល់ប្រជាជនក្នុងតំបន់ នាំឱ្យពួកគេមានអារម្មណ៍ទទួលនិងសុភមង្គលកាន់តែច្រើនឡើងៗ ។ ភាគីចិនក៏នឹងបន្តគាំទ្រយ៉ាងម៉ឺងម៉ាត់នូវមីយ៉ាន់ម៉ាដែលគាំពារសិទ្ធិនិងផលប្រយោជន៍ស្របច្បាប់និងកិត្តិយសជាតិលើឆាកអន្តរជាតិ ។
លោក U Win Myint តាងនាមរដ្ឋាភិបាលនិងប្រជាជនមីយ៉ាន់ម៉ាស្វាគមន៍យ៉ាងរាក់ទាក់កក់ក្តៅចំពោះលោកប្រធានរដ្ឋចិនស៊ីជីនភិងទៅបំពេញទស្សនកិច្ចផ្លូវរដ្ឋនៅមីយ៉ាន់ម៉ា លោកជឿជាក់ថា ទស្សនកិច្ចលើកនេះមុខជានឹងក្លាយជាទស្សនកិច្ចប្រវត្តិសាស្ត្រមួយ ដែលបើកទំព័រថ្មីនៃទំនាក់ទំនងមីយ៉ាន់ម៉ានិងចិន ។ លោក U Win Myint សូមកោតសរសើរនូវសមិទ្ធផលដ៏មហិមាដែលសាធារណរដ្ឋប្រជាមានិតចិនទទួលបានក្នុងរយៈពេល៧០ឆ្នាំចាប់តាំងពីបង្កើតឡើងរៀងមក ហើយសង្ឃឹមថា ប្រទេសចិនអាចចែករំលែកបទពិសោធន៍អភិបាលកិច្ចជាតិជាមួយនឹងប្រទេសកំពុងអភិវឌ្ឍន៍ដូចជាមីយ៉ាន់ម៉ាជាដើម ។ ជឿជាក់ថា បទពិសោធន៍ដ៏ជោគជ័យនៃប្រទេសចិននឹងផ្តល់ជាបទពិសោធន៍ដ៏មានផលប្រយោជន៍សម្រាប់ប្រទេសមីយ៉ាន់ម៉ាអភិវឌ្ឍសេដ្ឋកិច្ច កែលំអជីវភាពរស់នៅនិងកាត់បន្ថយភាពក្រីក្រ ។ ភាគីមីយ៉ាន់ម៉ាគោរពយ៉ាងម៉ឺងម៉ាត់នូវគោលការណ៍មានប្រទេសចិនតែមួយ គោរពគោលការណ៍ប្រទេសមួយ ប្រព័ន្ធគ្រប់គ្រងពីរដែលអនុវត្តនៅហុងកុងនិងម៉ាកាវ ហើយយល់ឃើញជានិច្ចថា តៃវ៉ាន់គឺជាចំណែកមិនអាចបំបែកបាននៃទឹកដីចិន ។ ភាគីមីយ៉ាន់ម៉ាគាំទ្រការផ្តើមគំនិតរបស់លោកស៊ីជីនភីងស្តីពីការកសាងសហគមន៍រួមវាសនានៃមនុស្សជាតិ រីករាយបង្កើតសហគមន៍រួមវាសនារវាងមីយ៉ាន់ម៉ានិងចិនដោយសកម្ម ។ ភាគីចិនបានផ្តល់ការជួយឧបត្ថម្ភយ៉ាងខ្លាំងដល់ការអភិវឌ្ឍសេដ្ឋកិច្ចនិងសង្គមមីយ៉ាន់ម៉ា កិច្ចសហប្រតិបត្តិការបានផ្តល់ផលប្រយោជន៍ដល់ជីវភាពរស់នៅរបស់ប្រជាជននិងបានផ្តោតលើការការពារបរិស្ថាន ។ ភាគីទាំងពីរជំរុញការរួមគ្នាកសាងរបៀងសេដ្ឋកិច្ចរវាងមីយ៉ាន់ម៉ានិងចិនក្នុងក្របខ័ណ្ឌខ្សែក្រវាត់និងផ្លូវ វាមានសារសំខាន់ចំពោះការអភិវឌ្ឍជាតិមីយ៉ាន់ម៉ា ។ ជឿជាក់ថា ទន្ទឹមនឹងកិច្ចសហប្រតិបត្តិការកាន់តែស៊ីជម្រៅជារៀងរាល់ថ្ងៃ ទំនាក់ទំនងរវាងមីយ៉ាន់ម៉ានិងចិននិងទទួលបានការអភិវឌ្ឍកាន់តែខ្លាំង ៕