ក្នុងឆ្នាំ ២០១៩ នេះ ប្រទេសចិនបានសម្រេចជាម្តងទៀតនូវភារកិច្ចក្នុងការកាត់បន្ថយភាពក្រីក្រលើមនុស្សចំនួនជាង ១០ លាននាក់ ដែលអ្នកក្រីក្រចំនួនលើសពី 95% នឹងរួចផុតពីភាពក្រីក្រ។
សព្វថ្ងៃនេះ មនុស្សចំនួនជាង ៧០០ លាននាក់នៅទូទាំងពិភពលោកនៅតែស្ថិតក្រោមខ្សែបន្ទាត់នៃភាពក្រីក្រ។ បទពិសោធន៍និងវិធីសាស្ត្រដែលប្រទេសចិនបានណែនាំនិងអនុវត្តដូចជា ជួយអ្នកក្រីក្រតាមរយៈការអភិវឌ្ឍឧស្សាហកម្ម ជួយអ្នកក្រីក្រយ៉ាងជាក់លាក់ជាដើម បានផ្តល់មេរៀនដ៏ល្អមួយដល់ការងារកាត់បន្ថយភាពក្រីក្រសម្រាប់បណ្តាប្រទេសកំពុងអភិវឌ្ឍន៍ ហើយត្រូវបានសហគមន៍អន្តរជាតិទទួលស្គាល់យ៉ាងទូលំទូលាយ។ លើសពីនេះទៅទៀត ចិននៅតែខិតខំជួយឧបត្ថម្ភគាំទ្រប្រទេសកំពុងអភិវឌ្ឍន៍ដទៃទៀតតាមសមត្ថភាពរបស់ខ្លួនដោយមិនមានលក្ខខ័ណ្ឌនយោបាយណាមួយឡើយ។ នៅក្នុងកិច្ចសហប្រតិបត្តិការអន្តរជាតិបែបបើកទូលាយ ចិនកាន់តែយកចិត្តទុកដាក់បន្ថែមទៀតចំពោះកិច្ចសហប្រតិបត្តិការដែលផ្តល់ប្រយោជន៍ដល់គ្នាទៅវិញទៅមក និងឈ្នះ-ឈ្នះ ដើម្បីជួយប្រទេសកំពុងអភិវឌ្ឍន៍ផ្សេងទៀត អាចលើកកម្ពស់សមត្ថភាពអភិវឌ្ឍន៍ប្រកបដោយនិរន្តរភាព។ របាយការណ៍ស្រាវជ្រាវនៃធនាគារពិភពលោកបានបង្ហាញឱ្យដឹងថា គំនិតផ្តួចផ្តើម "ខ្សែក្រវាត់និងផ្លូវ "បានជួយមនុស្សចំនួន ៧៦ សែននាក់នៃប្រទេសពាក់ព័ន្ធឱ្យចេញផុតពីភាពក្រីក្រកម្រិតខ្លាំង និងបានជួយមនុស្សចំនួន ៣២០ សែននាក់ឱ្យចេញផុតពីភាពក្រីក្រកម្រិតមធ្យម។ កិច្ចខិតខំប្រឹងប្រែងកាត់បន្ថយភាពក្រីក្ររបស់ប្រទេសចិនបានឆ្លុះបញ្ចាំងនូវទំនួលខុសត្រូវនៃប្រទេសកំពុងអភិវឌ្ឍន៍ដ៏ធំមួយក្នុងការជំរុញបុព្វហេតុកាត់បន្ថយភាពក្រីក្រលើពិភពលោក។
ប្រទេសចិននឹងឈានចូលសង្គមដែលប្រជាជនមានជីវភាពធូរធារបង្គួរគ្រប់ជ្រុងជ្រោយនៅឆ្នាំ ២០២០ នេះមិនត្រឹមតែនឹងបង្កើត “អច្ឆរិយរបស់ប្រទេសចិន” ក្នុងប្រវត្តិសាស្តកាត់បន្ថយភាពក្រីក្រនៃមនុស្សជាតិប៉ុណ្ណោះទេ ថែមទាំងនឹងជំរុញទំនុកចិត្តដល់សហគមន៍អន្តរជាតិដើម្បីឈ្នះលើភាពក្រីក្រ និងផ្តល់ "កូនសោមាស"មួយដល់ការអភិវឌ្ឍជានិរន្តរភាពនៃសកលលោក៕
