ពេលជួបពិភាក្សាជាមួយលោកអាបេស៊ីនហ្សូនាយករដ្ឋមន្រ្តីជប៉ុននៅវិមានសភាប្រជាជនក្រុងប៉េកាំងកាលពីថ្ងៃទី២៣ខែមករា លោកស៊ីជីនភីងប្រធានរដ្ឋចិនបានលើកឡើងថា ទំនាក់ទំនងរវាងចិននិងជប៉ុនកំពុងប្រឈមនឹងកាលានុវត្តភាពអភិវឌ្ឍន៍ដ៏សំខាន់ ដើម្បីអភិវឌ្ឍឱ្យបានល្អនូវទំនាក់ទំនងរវាងចិននិងជប៉ុនក្នុងយុគសម័យថ្មី ភាគីទាំងពីរគួរតែកំណត់ឱ្យបានច្បាស់លាស់នូវគំនិតឯកភាពរួមខាងយុទ្ធសាស្រ្ត ក្តាប់ជាប់ទិសដៅត្រឹមត្រូវ ត្រួសត្រាយកិច្ចសហប្រតិបត្តិការជាក់ស្តែង និងបង្កើនការផ្លាស់ប្តូរខាងវិស័យវប្បធម៌ជាដើម ម្យ៉ាងវិញទៀត ក៏គួរបង្កើនការកសាងទំនុកចិត្តខាងសន្តិសុខទៅវិញទៅមក ក៏ដូចជាបង្ហាញពីទំនួលខុសត្រូវអន្តរជាតិផងដែរ ។
ក្នុងកិច្ចជំនួបនេះដែរ លោកស៊ីជីនភីងបានសម្តែងការស្វាគមន៍ចំពោះលោកអាបេ ស៊ីនហ្សូដែលអញ្ជើញមកប្រទេសចិនដើម្បីចូលរួមសន្និសីទថ្នាក់ដឹកនាំចិន ជប៉ុននិងកូរ៉េខាងត្បូងលើកទី៨ ។ លោកបានថ្លែងថា នៅក្រោមការខិតខំប្រឹងប្រែងរួមរបស់ភាគីទាំងពីរ ទំនាក់ទំនងរវាងចិននិងជប៉ុនត្រូវបានកែលម្អជាបន្តបន្ទាប់ ។ភាគីចិនរីករាយរក្សាការប្រាស្រ័យទាក់ទងយ៉ាងជិតស្និទ្ធជាមួយភាគីជប៉ុន បង្កើនការណែនាំខាងនយោបាយ ជំរុញទំនាក់ទំនងរវាងចិននិងជប៉ុនឱ្យឡើងដល់កម្រិតថ្មីទៀត ដើម្បីផ្តល់សុខសុភមង្គលនិងផលប្រយោជន៍កាន់តែច្រើនជូនដល់ប្រជាជននៃប្រទេសទាំងពីរ ៕
