លោកស៊ីជីនភីងប្រធានរដ្ឋចិនបានជួបពិភាក្សាការងារជាមួយលោកNikolaiPatrushevលេខាធិការនៃទីប្រឹក្សាសន្តិសុខសហព័ន្ធរុស្ស៊ីនៅទីក្រុងប៉េកាំងកាលពីថ្ងៃទី២ខែធ្នូ។
លោកស៊ីជីនភីងបានគូសបញ្ជាក់ថា ចាប់ពីឆ្នាំ២០១៩មក បស្ចិមប្រទេសដូចជាអាមេរិកជាដើមបានបង្កើនការជ្រៀតជ្រែកកិច្ចការផ្ទៃក្នុងរបស់ប្រទេសចិននិងរុស្ស៊ី និងគំរាមកំហែងដល់សន្តិសុខអធិបតេយ្យភាពរបស់ប្រទេសទាំងពីរ និងរារាំងដល់ការអភិវឌ្ឍសេដ្ឋកិច្ចនិងសង្គមនៃប្រទេសទាំងពីរ។លោកភូទីនធ្លាប់និយាយថា ធ្វើបែបនេះគឺខុសឆ្គងទាំងស្រុងនិងខូចផលប្រយោជន៍ទាំងសងខាង ហើយប្រទេសចិនយល់ស្របទាំងស្រុងចំពោះពាក្យសម្តីរបស់លោកភូទីន។លោកស៊ីជីនភីងបានសម្តែងការជឿជាក់ថា គ្មានកម្លាំងណាមួយអាចរារាំងប្រជាជនចិននិងជនជាតិចិនបោះជំហានទៅមុខនោះទេ ហើយប្រជាជនរុស្ស៊ីក៏មិនអាចត្រូវបានគេជ្រៀតជ្រែកនិងរំខានដោយកម្លាំងខាងក្រៅនោះដែរពោលគឺនឹងបន្តដើរតាមផ្លូវអភិវឌ្ឍន៍របស់ខ្លួនឯងយ៉ាងម៉ឺងម៉ាត់តទៅទៀត។ប្រទេសចិននិងរុស្ស៊ីគួរតែគាំពារផលប្រយោជន៍ជាស្នូលរៀងៗខ្លួននិងសន្តិសុខរួមគ្នានៃប្រទេសទាំងពីរនិងគាំពារសន្តិភាពនិងស្ថិរភាពក្នុងតំបន់និងពិភពលោកតាមរយៈបន្តប្រើប្រាស់វេទិកាចំនួនពីរគឺការពិគ្រោះពិភាក្សាសន្តិសុខយុទ្ធសាស្រ្តនិងកិច្ចសហប្រតិបត្តិការសន្តិសុខក្នុងផ្នែកការអនុវត្តច្បាប់ឱ្យបានល្អ។
លោកNikolaiPatrushevបានថ្លែងថា ទំនាក់ទំនងរវាងរុស្ស៊ីនិងចិនមានភាពរឹងមាំដែលមិនអាចបំបែកបាន។គោលនយោបាយមួយចំនួនរបស់អាមេរិកនាពេលបច្ចុប្បន្ននេះបានបង្កឥទ្ធិពលអវិជ្ជមានទៅលើប្រព័ន្ធនិងសណ្តាប់ធ្នាប់អន្តរជាតិទាំងមូល។ភាគីទាំងពីររុស្ស៊ីនិងចិនត្រូវតែបន្តបង្កើនការសម្របសម្រួលយ៉ាងជិតស្និទ្ធគាំពារស្ថិរភាពយុទ្ធសាស្រ្តអន្តរជាតិនិងជំរុញពហុភាគីនិងប្រជាធិបតេយ្យនៃទំនាក់ទំនងអន្តរជាតិដើម្បីគាំពារច្បាប់អន្តរជាតិនិងរបៀបរៀបរយអន្តរជាតិដោយយុត្តិធម៌។
