កាលពីថ្ងៃទី ១ ខែធ្នូ លោកWang Qishan អនុប្រធានរដ្ឋចិនបានអញ្ជើញចូលរួមពិធីសម្ពោធបើកវេទិកាអន្តរជាតិCongdu ឆ្នាំ ២០១៩ ព្រមទាំងថ្លែងសន្ទរកថានៅក្រុងក្វាងចូវ ប្រទេសចិន ។
លោកWang Qishan បានថ្លែងថា សន្តិភាពនិងការអភិវឌ្ឍជាប្រធានបទសំខាន់នៃយុគសម័យ ។ ពហុភាគីនិយមជាជម្រើសដ៏ចាំបាច់នៃមនុស្សជាតិ ។ ការពង្រីកកិច្ចសហប្រតិបត្តិការនិងការអភិវឌ្ឍរួមជាតម្រូវការជាទូទៅនៃបណ្តាប្រទេសនានាលើពិភពលោក ។
លោកWang Qishan បានបញ្ជាក់ថា ប្រទេសចិនជាអ្នកគាំពារនិងអនុវត្តជាក់ស្តែងនូវពហុភាគីនិយម គោរពជានិច្ចនូវគោលបំណងនិងគោលការណ៍នៃធម្មនុញ្ញអង្គការសហប្រជាជាតិ ដោយបំពេញទំនួលខុសត្រូវអន្តរជាតិយ៉ាងសកម្ម ដើម្បីរួមចំណែកយ៉ាងសំខាន់ដល់ការងើបឡើងវិញនូវកំណើនសេដ្ឋកិច្ចពិភពលោក ។ ប្រទេសចិនបានបើកទូលាយទីផ្សារយ៉ាងសកម្ម ប្រកាន់ខ្ជាប់នូវការអភិវឌ្ឍដោយសន្តិវិធី និងផ្តល់ផលប្រយោជន៍ដល់ពិភពលោកតាមរយៈការអភិវឌ្ឍរបស់ខ្លួន ។
លោកWang Qishan បានថ្លែងថា ប្រទេសចិនមានឆន្ទៈរួមសហការជាមួយសហគមន៍អន្តរជាតិ ដើម្បីអនុវត្តតាមរបៀបវារៈនៃការអភិវឌ្ឍន៍ប្រកបដោយចីរភាពឆ្នាំ២០៣០ ក្នុងន័យកសាងសង្គមសុភមង្គលមួយដែលប្រកបដោយបរិយាប័ន្ននិងផ្តល់ផលប្រយោជន៍ដល់គ្នាទៅវិញទៅមក ។
វេទិកាអន្តរជាតិCongdu ឆ្នាំ ២០១៩ បានប្រារព្ធឡើងក្រោមប្រធានបទស្តីពី “ ពហុភាគីនិយមនិងការអភិវឌ្ឍប្រកបដោយចីរភាព “ ។ អតីតអ្នកនយោបាយអន្តរជាតិនិងអ្នកទទួលខុសត្រូវនៃអង្គការអន្តរជាតិ សហគ្រិនជាតិនិងអន្តរជាតិ អ្នកជំនាញនិងបញ្ញវន្តជាង ២៦០ រូបបានចូលរួមវេទិកាលើកនេះ ។
