លោក ស៊ីជីនភីង ប្រធានរដ្ឋចិនបានជួបពិភាក្សាការងារជាមួយលោក Henry Alfred Kissinger អតីតរដ្ឋមន្រ្តីក្រសួងការបរទេសអាមេរិកនៅវិមានសភាប្រជាជនចិនកាលពីថ្ងៃទី ២២ ខែវិច្ឆិកា។
ថែ្លងក្នុងកិច្ចជំនួប លោក ស៊ីជីនភីង បានចង្អុលបង្ហាញថា ទំនាក់ទំនងចិន-អាមេរិកនាពេលបច្ចុប្បន្ន គឺស្ថិតនៅក្នុងដំណាក់កាលដ៏សំខាន់មួយ ហើយប្រឈមនឹងការលំបាកនិងបញ្ហាមួយចំនួន។ភាគីទាំងពីរ ចិននិងអាមេរិកគួរតែពង្រឹងការប្រាស្រ័យទាក់ទងគ្នាលើបញ្ហាយុទ្ធសាស្ត្រនិងបង្កើនការយោគយល់គ្នាទៅវិញទៅមក។ភាគីទាំងពីរគួរតែគិតពិចារណាពីផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរនិងប្រជាជនពិភពលោក ក៏ដូចជាគោរពគ្នាទៅវិញទៅមកព្រមទាំងកិច្ចសហប្រតិបត្តិការនិងឈ្នះ-ឈ្នះដើម្បីជំរុញឱ្យទំនាក់ទំនងរវាងចិននិងអាមេរិកអភិវឌ្ឍឆ្ពោះទៅមុខក្នុងទិសដៅដ៏ត្រឹមត្រូវ។
ជាការឆ្លើយតប លោក Henry Alfred Kissinger បានថែ្លងថា នាពេលបច្ចុប្បន្ននេះ បរិបទនៃយុគសម័យបានផ្លាស់ប្តូរ ហើយសារៈសំខាន់នៃទំនាក់ទំនងរវាងអាមេរិកនិងចិនកាន់តែមានភាពលេចធ្លោជាងមុន។ភាគីទាំងពីរគួរតែពង្រឹងការប្រាស្រ័យទាក់ទងគ្នាជាយុទ្ធសាស្ត្រ ខិតខំស្វែងរកដំណោះស្រាយវិវាទដោយសមរម្យ ក៏ដូចជាបន្តអនុវត្តការផ្លាស់ប្តូរនិងកិច្ចសហប្រតិបត្តិការលើគ្រប់វិស័យដែលវាមានសារៈសំខាន់យ៉ាងខ្លាំងសម្រាប់ប្រទេសទាំងពីរនិងពិភពលោក៕
