ថ្ងៃទី ១៤ ខែវិច្ឆិកា តាមម៉ោងក្នុងតំបន់ កិច្ចជំនួបលើកទី១១នៃអ្នកដឹកនាំប្រទេស BRICS បានប្រារព្ធធ្វើនៅក្រុងប្រេស៊ីលីយ៉ា រដ្ឋធានីប្រទេសប្រេស៊ីល ។ អ្នកដឹកនាំនៃប្រទេសBRICS ទាំង៥ គឺចិន រុស្ស៊ី ឥណ្ឌា អាហ្វ្រិកខាងត្បូងនិងប្រេស៊ីលបានផ្លាស់ប្តូរមតិយោបល់យ៉ាងជ្រាលជ្រៅអំពីប្រធានបទស្តីពី “កំណើនសេដ្ឋកិច្ចបង្កអនាគតនៃនវានុវត្តន៍” ដោយផ្តោតលើកិច្ចសហប្រតិបតិ្តការរវាងប្រទេស BRICS និងបញ្ហាអន្តរជាតិសំខាន់ៗដែលយកចិត្តទុកដាក់ដូចគ្នា ព្រមទាំងបានឈានដល់មតិឯកភាពរួមយ៉ាងទូលំទូលាយ ។
ក្នុងកិច្ចជំនួប លោក ស៊ី ជីនភីង ប្រធានរដ្ឋចិនបានថ្លែងសុន្ទរកថាគន្លឹះដែលមានចំណងជើងថា «ចាប់ដៃគ្នា ខិតខំប្រឹងប្រែងចារទំព័រថ្មីនៃកិច្ចសហប្រតិបតិ្តការ » ដោយបានគូសបញ្ជាក់ថា ប្រទេស BRICS គួរបង្ហាញពីភាពទទួលខុសត្រូវរបស់ខ្លួន ផ្តួចផ្តើមនិងអនុវត្តតាមពហុភាគីនិយម ក្នុងន័យបង្កបង្កើតបរិយាកាសសន្តិសុខដែលប្រកបដោយសន្តិភាពនិងស្ថិរភាព ក្តាប់ជាប់នូវកាលានុវត្តភាពយុគសម័យនៃកំណែទម្រង់និងការច្នៃប្រឌិតថ្មី ក្នុងន័យពង្រឹងនិងពង្រីកទំនាក់ទំនងភាពជាដៃគូបដិវត្តន៍ឧស្សាហកម្មជំនាន់ថ្មីរវាងប្រទេសBRICS ត្រួសត្រាយឥតឈប់ឈរនូវវិសាលភាពនិងភាពស៊ីជម្រៅនៃការផ្លាស់ប្តូរលើវិស័យវប្បធម៌មនុស្សជាតិ ។ ប្រទេសចិននឹងប្រកាន់ខ្ជាប់ការបើកទូលាយចំពោះបរទេស ជំរុញការរួមគ្នាកសាង “ខ្សែក្រវាត់និងផ្លូវ”ប្រកបដោយគុណភាពខ្ពស់ ធ្វើការខិតខំប្រឹងប្រែងដើម្បីឈានដល់ការបង្កើតសហគមន៍រួមវាសនាតែមួយរបស់អាស៊ីប៉ាស៊ីហ្វិកក៏ដូចជាសហគមន៍រួមវាសនាតែមួយរបស់មនុស្សជាតិផងដែរ ។
ក្នុងកិច្ចជំនួប អ្នកដឹកនាំនៃប្រទេសទាំង៥បានមូលគំនិតគ្នាថា នឹងរួមចិត្តរួមកម្លាំងគ្នា ក្នុងន័យបង្កើនជាយន្តការសហប្រតិបតិ្តការប្រទេសBRICS ដើម្បីសម្រេចបាននូវវឌ្ឍនភាពនិងវិបុលភាពរួម ។
សូមបញ្ជាក់ថា កិច្ចជំនួបលើកនេះបានចេញផ្សាយ«សេចកី្តប្រកាសស្តីពីកិច្ចជំនួបលើកទី១១នៃអ្នកដឹកនាំប្រទេសBRICSក្រុងប្រេស៊ីលីយ៉ា» ផងដែរ ៕
