លោក ស៊ី ជីនភីង ប្រធានរដ្ឋចិននឹងចេញដំណើរទៅបំពេញទស្សនកិច្ចផ្លូវរដ្ឋនៅប្រទេសក្រិកនៅថ្ងៃទី ១០ ខែវិច្ឆិកា ខាងមុខនេះព្រមទាំងនឹងធ្វើដំណើរទៅប្រទេសប្រេស៊ីលដើម្បីអញ្ជើញចូលរួមកិច្ចជំនួបលើកទី ១១ នៃមេដឹកនាំបណ្តាប្រទេស BRICS ។ក្នុងឱកាសបើកទសវត្សទី ២ នៃកិច្ចសហប្រតិបត្តិការ រវាងបណ្តាប្រទេស BRICS លោក ស៊ី ជីនភីង នឹងធ្វើអត្ថាធិប្បាយជាថ្មីម្តងទៀតលើ"គំនិត BRICS "របស់ភាគីចិនដើម្បីជួយប្រទេសចំនួន ៥ បង្កើត"អនាគតប្រកបដោយភាពច្នៃប្រឌិតថ្មី"។
លោកស្រី Chen Fengying អ្នកសិក្សាស្រាវជ្រាវនៃវិទ្យាស្ថានទំនាក់ទំនងអន្តរជាតិចិនបានថែ្លងថា ដំណើរទស្សនកិច្ចរបស់លោកប្រធានរដ្ឋចិន ស៊ី ជីនភីង នឹងជំរុញបន្ថែមទៀតនូវការអភិវឌ្ឍប្រកបដោយគុណភាពខ្ពស់នៃ"ខ្សែក្រវ៉ាត់និងផ្លូវ"និងលើកកម្ពស់ការតភ្ជាប់គ្នារវាងចិននិងអឺរ៉ុប។ទីផ្សារកំពុងរីកចម្រើននិងបណ្តាប្រទេសកំពុងអភិវឌ្ឍន៍នានាដែលជាសមាជិកនៃអង្គការ BRICS បានលេចចេញជាន្តបន្ទាប់ដែលបានជំរុញយ៉ាងខ្លាំងនូវដំណើរការពហុភាគីភាវូបនីយកម្មនៃពិភពលោក។សេដ្ឋកិច្ចឌីជីថលនិងបដិវត្តបច្ចេកវិទ្យានឹងក្លាយជាចំណុចផ្តោតដ៏សំខាន់នៃកិច្ចជំនួប BRICS នេះ។
រហូតមកដល់បច្ចុប្បន្ននេះ បណ្តាប្រទេស BRICS បានក្លាយជាកម្លាំងស្ថាបនាដើម្បីជំរុញកំណើនសេដ្ឋកិច្ចពិភពលោក កែលម្អនូវអភិបាលកិច្ចពិភពលោកនិងលើកកម្ពស់លទ្ធិប្រជាធិបតេយ្យនៃទំនាក់ទំនងអន្តរជាតិ។
លោក Cui Hongjian នាយកវិទ្យាស្ថានសិក្សាស្រាវជ្រាវអឺរ៉ុបនៃវិទ្យាស្ថានសិក្សាបញ្ហាអន្តរជាតិចិនជឿជាក់ថា ប្រឈមមុខនឹងការកើនឡើងនៃឯកតោភាគីនិយមនិងការការពារនិយម បណ្តាប្រទេសកាន់តែច្រើនកំពុងងាកទៅរកកិច្ចសហប្រតិបត្តិការ BRICS ហើយរំពឹងថា អាចរួមគ្នាធានារក្សានូវពហុភាគីនិយមដើម្បីផ្តល់នូវថាមពលជាវិជ្ជមានទៅក្នុងវិបុលភាពនិងការអភិវឌ្ឍនៃពិភពលោក៕