ថ្ងៃទី ៩ វិច្ឆិកានេះជាទិវាបុណ្យឯករាជ្យជាតិកម្ពុជា ។ លោកស៊ីជីនភីង ប្រធានរដ្ឋចិនបានផ្ញើសារលិខិតថ្វាយព្រះពរនិងអបអរសាទរជូនព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ។ ខ្លឹមសារនៃសារលិខិតមានដូចតទៅ ៖
ព្រះមហាក្សត្រជាទីគោរពដ៏ខ្ពង់ខ្ពស់ ៖
ក្នុងឱកាសខួប ៦៦ ឆ្នាំនៃទិវាបុណ្យឯករាជ្យជាតិនៃព្រះរាជាណាចក្រកម្ពុជា ខ្ញុំសូមតាងនាមរដ្ឋាភិបាលចិននិងប្រជាជនចិន ព្រមទាំងរូបខ្ញុំផ្ទាល់ សូមសម្តែងនូវការអបអរសាទរយ៉ាងកក់ក្តៅនិងការជូនពរយ៉ាងល្អប្រសើរចំពោះរាជវង្សានុវង្ស ព្រឹទ្ធសភា រដ្ឋសភា រាជរដ្ឋាភិបាលកម្ពុជានិងប្រជាជនកម្ពុជាដែលជាបងប្អូន ។
ប៉ុន្មានឆ្នាំកន្លងមកនេះ ប្រជាជនកម្ពុជាបានប្រកាន់ខ្ជាប់ការដើរតាមមាគ៌ាអភិវឌ្ឍន៍ដែលសមស្របតាមសភាពការណ៍ជាតិរបស់ខ្លួន ហើយទទួលបានសមិទ្ធផលដ៏ធំធេងថ្មីឥតឈប់ឈរក្នុងកិច្ចការកសាងជាតិ ។ ក្នុងនាមជាប្រទេសជិតខាងមិត្តភាពជាប្រពៃណី យើងមានទឹកចិត្តសោមន្សរីករាយយ៉ាងក្រៃលែងចំពោះការនេះ ។ ខ្ញុំបានយកចិត្តទុកដាក់ខ្ពស់ដល់ការអភិវឌ្ឍទំនាក់ទំនងរវាងចិននិងកម្ពុជា និងរីករាយខិតខំប្រឹងប្រែងជាមួយព្រះអង្គ ដើម្បីផ្សព្វផ្សាយមិត្តភាពប្រពៃណី ក៏ដូចជាធ្វើឱ្យកិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមកមានភាពស៊ីជម្រៅ ព្រមទាំងពួតដៃគ្នាកសាងសហគមន៍រួមវាសនារវាងចិននិងកម្ពុជាដែលមានអត្ថន័យជាយុទ្ធសាស្ត្រ ។
ខ្ញុំថ្នាក់ថ្នមមិត្តភាពពិសេសជាមួយនឹងព្រះអង្គ សម្តេចព្រះមហាក្សត្រីនរោត្តម មុនីនាថ សីហនុនិងព្រះរាជវង្សានុវង្សកម្ពុជា ស្វាគមន៍ព្រះអង្គនិងព្រះមហាក្សត្រីអញ្ជើញយាងមកពិនិត្យសុខភាពនិងសម្រាកព្រះកាយនៅប្រទេសចិនក្នុងគ្រប់ពេលវេលា ។
សូមប្រសិទ្ធពរឱ្យព្រះអង្គមានព្រះរាជសុខភាពល្អបរិបូរនិងសម្រេចព្រះរាជកិច្ចដោយជោគជ័យនិងរលូន ។
សូមជូនពរឱ្យប្រទេសកម្ពុជាមានភាពរុងរឿងថ្កុំថ្កើង ប្រជាជនកម្ពុជាមានសុភមង្គលនិងសុខសាន្តត្រាណ ៕
ប្រធានសាធារណរដ្ឋប្រជាមានិតចិន ស៊ីជីនភីង
ថ្ងៃទី ៩ វិច្ឆិកា ពីក្រុងប៉េកាំង