លោកSomdetSusomboonឧបនាយករដ្ឋមន្រ្តីនិងជារដ្ឋមន្រ្តីពាណិជ្ជកម្មថៃបានដឹកនាំគណៈប្រតិភូចូលរួមពិធីសម្ពោធបើកនៃពិព័រណ៍នាំចូលចិនអន្តរជាតិលើកទី២ដែលធ្វើនៅទីក្រុងសៀងហៃពីថ្ងៃទី៥ដល់ថ្ងៃទី៦ខែវិច្ឆិកា។លោកបានថ្លែងថា ប្រទេសថៃទន្ទឹងរង់ចាំបង្ហាញលក្ខណៈពិសេសរបស់ទំនិញថៃទៅកាន់ពិភពលោកតាមរយៈពិព័រណ៍នាំចូលចិនអន្តរជាតិដែលជាវេទិកាសំខាន់នៃពាណិជ្ជកម្មពិភពលោក។
លោកបានបង្ហាញថា ប្រទេសថៃបានជ្រើសរើសសហគ្រាសដ៏មានគុណភាពខ្ពស់ចំនួន៤៦ឱ្យចូលរួមពិព័រណ៍នាំចូលចិនអន្តរជាតិលើកនេះមានដូចជាសម្ភារៈប្រើប្រាស់ក្នុងជីវភាពប្រចាំថ្ងៃ គ្រឿងអលង្កា ផលិតផលកសិកម្ម និងផលិតផលទេសចរណ៍ជាដើម តាមការប៉ាន់ប្រមាណថា ទំហំទឹកប្រាក់ជួញដូរនឹងលើសពី១ពាន់៥រយលានប្រាក់បាតថៃ។ព្រមពេលជាមួយគ្នា រាជរដ្ឋាភិបាលថៃនឹងជំរុញសហគ្រាសថៃចំនួនជាង១រយបើកហាងលក់ទំនិញតាមបណ្តាញអ៊ីនធើណែតនៅប្រទេសចិន។
លោកបន្តថា ប្រទេសចិនបានក្លាយទៅជាដៃគូពាណិជ្ជកម្មធំជាងគេនៃប្រទេសថៃក្នុងរយៈពេល៦ឆ្នាំជាប់គ្នា។លោកជឿជាក់ថា ពិព័រណ៍នាំចូលចិនអន្តរជាតិអាចធ្វើឱ្យសហគ្រាសនិងទំនិញថៃតភ្ជាប់ជាមួយនឹងទីផ្សារអន្តរជាតិកាន់តែច្រើននិងកាន់តែធំ។លើសពីនេះទៅទៀត ការពង្រីកកិច្ចសហប្រតិបត្តិការជាមួយសហគ្រាសចិននឹងជួយកាត់បន្ថយភាពខាតបង់ពាណិជ្ជកម្មដែលកើតឡើងដោយការអនុវត្តគោលនយោបាយដាក់របាំងពាណិជ្ជកម្មរបស់អាមេរិក។
