អង្គការសហប្រជាជាតិសម្រេចចាត់វិធានការសន្សំសំចៃការចំណាយដ៏ម៉ឺងម៉ាត់ ដើម្បីទប់ទល់នឹងវិបត្តិហិរញ្ញវត្ថុដ៏ធ្ងន់ធ្ងរបំផុតក្នុងរយៈពេល១០ឆ្នាំកន្លងទៅនេះនាពេលបច្ចុប្បន្ន ។
កាលពីថ្ងៃទី១១ខែតុលា លោក Stephane Dujarric អ្នកនាំពាក្យរបស់លោក Antonio Guterres អគ្គលេខាធិការអង្គការសហប្រជាជាតិបានប្រគល់សំបុត្រមួយឱ្យអ្នកសារព័ត៌មានដែលលោក Antonio Guterres បានសរសេរផ្ញើជូនអ្នកទទួលខុសត្រូវនៃអង្គភាពនានា ទីស្នាក់ការនានានិងគណៈកម្មាធិការក្នុងតំបន់នានានៃអង្គការសហប្រជាជាតិកាលពីថ្ងៃទី១០ខែតុលា។ លោក Antonio Guterres បានរាយការណ៍អំពីការលំបាកខាងហិរញ្ញវត្ថុដែលអង្គការសហប្រជាជាតិកំពុងប្រឈមនាពេលបច្ចុប្បន្ន ហើយទាមទារឱ្យមន្ត្រីអង្គការសហប្រជាជាតិគ្រប់ជាន់ថ្នាក់ចាត់វិធានការសន្សំសំចៃការចំណាយ ។
ថ្ងៃដដែល លោកស្រី Catherine Pollard អគ្គលេខាធិការរងនៃអង្គការសហប្រជាជាតិបានថ្លែងក្នុងសន្និសីទសារព័ត៌មានថា គិតត្រឹមថ្ងៃទី៩ខែតុលាឆ្នាំ២០១៩ ឱនភាពសាច់ប្រាក់នៃថវិកាទូទៅនៃអង្គការសហប្រជាជាតិបានឡើងដល់៣៨៦លានដុល្លារអាមេរិក ។ ដល់ចុងខែតុលា ឱនភាពសាច់ប្រាក់នៃឆ្នាំនេះនឹងច្រើនជាងកំណត់ត្រានៃឆ្នាំមុនគឺ៤៨៨លានដុល្លារអាមេរិក ។