លោក ស៊ីជីនភីង ប្រធានរដ្ឋចិនបានបន្តជួបពិភាក្សាការងារជាមួយលោក Modi នាយករដ្ឋមន្ត្រីឥណ្ឌានៅក្រុងChennai កាលពីថ្ងៃទី ១២ ខែតុលា ។ មេដឹកនាំនៃប្រទេសទាំងពីរបានផ្លាស់ប្តូរមតិគ្នាដោយស្មោះត្រង់និងយ៉ាងស៊ីជម្រៅអំពីទំនាក់ទំនងរវាងចិននិងឥណ្ឌាព្រមទាំងបញ្ហាអន្តរជាតិនិងតំបន់សំខាន់ៗ ។
លោកស៊ីជីនភីងបានថ្លែងថា នៅក្រោមស្ថានការណ៍អន្តរជាតិនាពេលបច្ចុប្បន្ននេះ ប្រទេសចិននិងឥណ្ឌាបានទទួលបន្ទុកសំខាន់ក្នុងវិស័យគាំពារស្ថិរភាពពិភពលោកនិងជំរុញការអភិវឌ្ឍ ។ ដូច្នេះ យើងត្រូវតែកំណត់ផែនការនៃការអភិវឌ្ឍទំនាក់ទំនងរវាងចិននិងឥណ្ឌារយៈពេល ១០០ ឆ្នាំក្នុងកម្រិតយុទ្ធសាស្ត្រនិងចក្ខុវិស័យយូរអង្វែង ដើម្បីបំពេញបន្ថែមកម្លាំងចលករឱ្យកាន់តែខ្លាំងក្លាសម្រាប់ដល់ការពង្រឹងនិងពង្រីកទំនាក់ទំនងរវាងចិននិងឥណ្ឌា រួមសហការគ្នាដើម្បីសម្រេចឱ្យបាននូវការស្តារភាពរុងរឿងដ៏មហិមារបស់អរិយធម៌ចិននិងឥណ្ឌាឡើងវិញ ។
លោក Modi បានថ្លែងថា ប្រទេសឥណ្ឌាសូមកោតសសើរចំពោះសមិទ្ធផលដ៏អស្ចារ្យរបស់ប្រទេសចិន ។ ឥណ្ឌានិងចិនសុទ្ធតែកំពុងស្ថិតនៅដំណាក់កាលនៃការស្តារភាពរុងរឿងនៃប្រទេសជាតិឡើងវិញ ហើយក៏កំពុងជួបបញ្ហាប្រឈមស្រដៀងគ្នាជាច្រើន។ ដូច្នេះ ឥណ្ឌារីករាយធ្វើការផ្លាស់ប្តូរនិងរៀនសូត្រពីគ្នាទៅវិញទៅមកជាមួយប្រទេសចិន ដើម្បីត្រួសត្រាយកិច្ចសហប្រតិបត្តិការការជាក់ស្តែងឱ្យកាន់តែស៊ីជម្រៅ ។ ក្នុងសតវត្សរ៍ទី ២១ សន្តិភាពពិភពលោកនិងការរីកចម្រើនរបស់មនុស្សជាតិមិនអាចឃ្លាតពីកិច្ចសហប្រតិបត្តិការរវាងចិននិងឥណ្ឌាបានឡើយ ។ ខ្ញុំបានយកចិត្តទុកដាក់និងថ្នាក់ថ្នមយ៉ាងខ្លាំងចំពោះមិត្តភាពជាមួយលោកស៊ីជីនភីង ប្រធានរដ្ឋចិន ហើយក៏រីករាយបន្តរក្សាការទាក់ទាងគ្នាជាយុទ្ធសាស្ត្រប្រកបដោយប្រសិទ្ធភាពនិងផលប្រយោជន៍បែបនេះជាមួយលោកតទៅទៀត ដើម្បីពួតដៃគ្នាត្រួសត្រាយអនាគតកាន់តែល្អបវរនៃទំនាក់ទំនងរវាងឥណ្ឌានិងចិន ។