លោក ស៊ី ជីនភីង ប្រធានរដ្ឋចិនបានជួបពិភាក្សាការងារជាមួយលោកស្រី Vidya Devi Bhandari ប្រធានាធិបតីនេប៉ាល់នៅទីស្តីការប្រធានាធិបតីនៅក្រុងកដ្ឋមណ្ឌូ កាលពីថ្ងៃទី ១២ ខែតុលា។ប្រមុខរដ្ឋនៃប្រទេសទាំងពីរបានប្រកាសថា ភាគីទាំងពីរនឹងបង្កើតទំនាក់ទំនងភាពជាដៃគូសហប្រតិបត្តិការយុទ្ធសាស្ត្ររវាងចិននិងនេប៉ាល់។
លោក ស៊ី ជីនភីង បានសង្កត់ធ្ងន់ថា ភាគីទាំងពីរគួរតែពង្រឹងមូលដ្ឋានគ្រឹះនយោបាយនៃទំនាក់ទំនងរវាងចិននិងនេប៉ាល់និងចាត់ទុកការកសាងសហគមន៍រួមវាសនាជាគោលដៅរយៈពេលវែងសម្រាប់ការអភិវឌ្ឍទំនាក់ទំនងរវាងចិននិងនេប៉ាល់។ប្រទេសចិននឹងគាំទ្រប្រទេសនេប៉ាល់ជានិច្ចក្នុងការការពារឯករាជ្យ ភាពអធិបតេយ្យភាពនិងបូរណភាពទឹកដី ក៏ដូចជាផ្តល់នូវការគាំទ្រនិងជំនួយតាមសមត្ថភាពរបស់ចិនដល់ការអភិវឌ្ឍសេដ្ឋកិច្ចនិងសង្គមរបស់នេប៉ាល់។
លោកស្រី Vidya Devi Bhandari បានថែ្លងថា ដំណើរទស្សនកិច្ចរបស់ប្រធានរដ្ឋចិនមកកាន់ប្រទេសនេប៉ាល់បន្ទាប់ពីរយៈពេល ២៣ ឆ្នាំ មានសារៈសំខាន់ជាប្រវត្តិសាស្ត្រយ៉ាងខ្លាំង។ការប្រកាសអំពីការបង្កើតទំនាក់ទំនងភាពជាដៃគូសហប្រតិបត្តិការយុទ្ធសាស្ត្ររវាងនេប៉ាល់និងចិនប្រាកដជាពង្រឹងនូវមិត្តភាពជាប្រពៃណីរវាងប្រទេសទាំងពីរ ព្រមទាំងបង្កើនខ្លឹមសារនៃទំនាក់ទំនងរវាងប្រទេសទាំងពីរដើម្បីជំរុញទំនាក់ទំនងរវាងនេប៉ាល់និងចិនឱ្យឈានចូលក្នុងយុគសម័យថ្មី៕