កាលពីថ្ងៃទី ១១ ខែតុលា តាមម៉ោងតំបន់ សភាពាណិជ្ជកម្មចិនប្រចាំនៅសហភាពអឺរ៉ុបបានចេញផ្សាយរបាយការណ៍មួយនៅទីក្រុងព្រុចសែល ដែលបានបូកសរុប នូវសកម្មភាពសេដ្ឋកិច្ចនិងពាណិជ្ជកម្មរបស់សហគ្រាសមូលធនចិនក្នុងទ្វីបអឺរ៉ុបទាំងស្រុងនាប៉ុន្មានឆ្នាំកន្លងមកនេះ ព្រមទាំងបានលើកសំណើផ្នែកគោលនយោបាយមួយចំនួនដល់បណ្តាស្ថាប័នរបស់សហភាពអឺរ៉ុបនិងរដ្ឋាភិបាលប្រទេសជាសមាជិកសហភាពអឺរ៉ុប ក្នុងន័យជួយកែលម្អថែមមួយកម្រិតទៀតដល់បរិយាកាសធ្វើពាណិជ្ជកម្មនិងដំណើរការរបស់ស្ថាប័នមូលធនចិននៅសហភាពអឺរ៉ុប។
« របាយការណ៍ស្តីពីការអភិវឌ្ឍនៅទ្វីបអឺរ៉ុបរបស់សហគ្រាសចិន (២០១៩) » ជារបាយការណ៍ទីមួយនៃសភាពាណិជ្ជកម្មចិននៅសហភាពអឺរ៉ុបបន្ទាប់ពីស្ថាប័នមួយនេះត្រូវបានបង្កើតឡើង។ លោក Zhou Lihong ប្រធានសភាពាណិជ្ជកម្មចិនប្រចាំនៅសហភាពអឺរ៉ុបបានថ្លែងថា និយាយជារួម របាយការណ៍នៃសភាពាណិជ្ជកម្មចិនប្រចាំនៅសហភាពអឺរ៉ុបមួយនេះបានបង្ហាញពីសុទិដ្ឋិនិយមចំពោះការអភិវឌ្ឍនៅទ្វីបអឺរ៉ុបរបស់សហគ្រាសចិនផង ក៏បានបង្ហាញយ៉ាងច្បាស់នូវបញ្ហាមួយចំនួនដែលសហគ្រាសចិនបាននឹងកំពុងប្រឈមមុខក្នុងអឺរ៉ុបផង។ ឧទាហរណ៍ដូចជា ការត្រួតពិនិត្យមូលធនបរទេសនៃសហភាពអឺរ៉ុបមានភាពកាន់តែតានតឹងពីមួយថ្ងៃទៅមួយថ្ងៃ បានដាក់សម្ពាធដល់សហគ្រាសចិនក្នុងការចូលទីផ្សារក្នុងវិស័យសំខាន់ៗមួយចំនួនដូចជា ថាមពល បញ្ញាសិប្បនិម្មិត ទូរគមនាគមន៍ ឧបករណ៍អេឡិចត្រូនិក ជាដើម។ សហភាពអឺរ៉ុបបានចាត់វិធានការរឹតបន្តឹងចំពោះការអភិវឌ្ឍអាជីវកម្មរបស់សហគ្រាសចិន ជាពិសេសសហគ្រាសនៃវិស័យបច្ចេកវិទ្យា ថាមពលនិងសហគ្រាសដែលគ្រប់គ្រងដោយរដ្ឋ ។
ដូច្នេះហើយ របាយការណ៍មួយនេះបានស្នើរដល់សហភាពអឺរ៉ុបគួរប្រកាន់ខ្ជាប់នូវគោលការណ៍ទីផ្សារសេរីដោយម៉ឺងម៉ាត់ ជៀសវាងធ្វើឱ្យបញ្ហាពាណិជ្ជកម្មក្លាយជាបញ្ហានយោបាយ ហើយត្រូវស្វែងរកចំណុចដូចគ្នានិងទុកចំណុចខុសគ្នានៅមួយអន្លើ ព្រមទាំងពង្រឹងកិច្ចសហប្រតិបត្តិការជាក់ស្តែងជាដើម៕
