បន្ទាប់ពីលោកDaryl Morey អគ្គនាយកនៃក្លិបបាល់បោះអាមេរិក The Houston Rockets មិនសុំអភ័យទោសចំពោះពាក្យសម្តីខុសឆ្គងអំពីបញ្ហាតំបន់ហុងកុងនិងសមាគមកីឡាបាល់បោះអាជីពអាមេរិក(NBA)ក៏មិនដាក់ទណ្ឌកម្ម លោក Adam Silver ប្រធានសមាគមកីឡាបាល់បោះអាជីពអាមេរិក(NBA) ថែមទាំងបានបង្ហាញពីការគាំទ្រសិទ្ធិសេរីភាពក្នុងការបញ្ចេញមតិរបស់លោក Daryl Morey ជាសាធារណៈថែមទៀត ។ កាលពីថ្ងៃទី៨ខែតុលា ប៉ុស្តិ៍កីឡានៃអគ្គស្ថានីយវិទ្យុនិងទូរទស្សន៍មជ្ឈិមចិនបានប្រកាសសេចក្តីថ្លែងការណ៍ម្តងទៀតដោយសម្រេចផ្អាកការផ្សាយបន្តផ្ទាល់នូវការប្រកួតរបស់ NBA ។ ជុំវិញករណីនេះ អ្នកនាំពាក្យនៃក្រសួងការបរទេសចិនបានបង្ហាញយ៉ាងច្បាស់លាស់ថា ការផ្លាស់ប្តូរនិងកិច្ចសហប្រតិបត្តិការជាមួយភាគីចិនប៉ុន្តែមិនយល់ពីមតិប្រជាជនចិន គឺមិនអាចដំណើរការបានឡើយ ។
ពាក្យសម្តីដ៏ខុសឆ្គងរបស់លោកDaryl Moreyមិនបានគោរពអធិបតេយ្យភាពនិងសេចក្តីថ្លៃថ្នូររបស់ប្រទេសចិន ហើយអាកប្បកិរិយារបស់លោកAdam Silverក៏កាន់តែមិនបានឆ្លុះបញ្ចាំងឱ្យឃើញនូវឥរិយាបថស្មើគ្នាថែមទៀត ផ្ទុយទៅវិញបានការពារពាក្យសម្តីបង្កហេតុដោយចេតនាចំពោះអធិបតេយ្យភាពរបស់ប្រទេសផ្សេងទៀតនិងបំផ្លាញមនោសញ្ចេតនារបស់ប្រជាជនចិន មិនតែប៉ុណ្ណោះទេ លោកAdam Silverនៅបានបង្កើតស្តង់ដារពីរនៃគុណតម្លៃ។ដូចអ្នកផងបានដឹងគ្រប់ៗគ្នាថា កាលពីឆ្នាំ២០១៤ លោកDonald SterlingអតីតនាយកនៃNBA Clippersនាពេលនោះត្រូវបានហាមឃាត់មិនឱ្យប្រកួតអស់មួយជីវិត ត្រូវបង្ខំឱ្យលក់ក្រុមនិងដាក់ពិន័យជាប្រាក់ដោយNBA ហើយមនុស្សដែលប្រកាសដាក់ពិន័យពេលនោះគឺលោក Adam Silver នេះឯង។
ក្នុងនាមជាសមាគមកីឡាបាល់បោះអាមេរិកទី ១ ដែលចូលក្នុងប្រទេសចិន ក្នុងរយៈពេល ៣០ ឆ្នាំកន្លងទៅ ដំណើរការពាណិជ្ជកម្មនៅប្រទេសចិនរបស់NBAទទួលបានជោគជ័យយ៉ាងខ្លាំង ។ ប៉ុន្តែថ្ងៃនេះក្នុងរយៈពេល ៣០ ឆ្នាំក្រោយមក មេដឹកនាំNBAបច្ចុប្បន្នហ៊ានជំទាស់នឹងសាធារណៈមតិនៃប្រជាជនចិន បណ្តោយឱ្យមានពាក្យសម្តីបង្ករឿងប៉ះពាល់ដល់អធិបតេយ្យភាពចិន ។ ទីផ្សារដែលបានខិតខំដំណើរការអស់រយៈពេល ៣០ ឆ្នាំនោះត្រូវបានបំផ្លាញដោយលោកAdam Silverជាដើមក្នុងរយៈពេលតែ ៣ ថ្ងៃប៉ុណ្ណោះ ។ បើលោកAdam Silverជាដើមមានខួរក្បាលដឹងខ្លួន នោះ គួរតែសុំអភ័យទោសដោយស្មោះដល់អ្នកស្នេហាកីឡាបាល់បោះនៃប្រទេសចិន ។ ប៉ុន្តែ បើលោកAdam Silverជាដើមទទូចទស្សនៈដដែល ក៏តាមចិត្តចុះ ៕