កាលពីថ្ងៃទី៨ខែតុលា ក្រុមប្រឹក្សាសន្តិសុខនៃអង្គការសហប្រជាជាតិបានប្រកាសសេចក្តីថ្លែងការណ៍របស់ប្រធាន ដោយសម្តែងការស្វាគមន៍ចំពោះការបង្កើតគណៈកម្មាធិការរដ្ឋធម្មនុញ្ញស៊ីរី ហើយគាំទ្រអង្គការសហប្រជាជាតិកោះធ្វើកិច្ចប្រជុំលើកទីមួយនៃគណៈកម្មាធិការរដ្ឋធម្មនុញ្ញស៊ីរីនៅក្រុងហ្សឺណែវមុនថ្ងៃទី៣០ខែតុលាផងដែរ ។
កាលពីថ្ងៃទី២៣ខែកញ្ញា លោក Antonio Guterres អគ្គលេខាធិការអង្គការសហប្រជាជាតិបានប្រកាសថា រដ្ឋាភិបាលស៊ីរីនិងបក្សប្រឆាំងបានឈានដល់កិច្ចព្រមព្រៀងចុងក្រោយមួយអំពីការបង្កើតគណៈកម្មាធិការរដ្ឋធម្មនុញ្ញ ។ តាមសិទ្ធិអំណាចនិងនីតិវិធីសំខាន់ៗនៃគណៈកម្មាធិការរដ្ឋធម្មនុញ្ញស៊ីរីដែលអង្គការសហប្រជាជាតិបានប្រកាសកាលពីថ្ងៃទី២៨ខែកញ្ញាឱ្យដឹងថា គណៈកម្មាធិការរដ្ឋធម្មនុញ្ញនេះគឺអាចធ្វើវិសោធនកម្មរដ្ឋធម្មនុញ្ញបច្ចុប្បន្ននេះ ហើយក៏អាចធ្វើសេចក្តីព្រាងរដ្ឋធម្មនុញ្ញថ្មីមួយទៀតផងដែរ ។
