ពិធីបិទបញ្ចប់នៃពិព័រណ៍សាកវប្បកម្មពិភពលោកក្រុងប៉េកាំងឆ្នាំ២០១៩បានធ្វើឡើងនៅយប់ថ្ងៃទី៩ខែតុលានេះ ។ កាលពីថ្ងៃទី៨ខែតុលា គណៈកម្មាធិការរៀបចំពិព័រណ៍សាកវប្បកម្មពិភពលោកក្រុងប៉េកាំងបានប្រកាសនៅក្នុងសន្និសីទសារព័ត៌មានដែលបានធ្វើឡើងនៅការិយាល័យព័ត៌មាននៃក្រុមប្រឹក្សាកិច្ចការរដ្ឋចិនថា ពិព័រណ៍សាកវប្បកម្មអន្តរជាតិដ៏ឱឡារិកដែលមានរយៈពេលជាង៥ខែនេះទទួលបានភ្ញៀវទេសចរសរុបចំនួន៩លាន៣សែន៤ម៉ឺននាក់ ។
លោកស្រី Gaoyan ប្រធានសមាគមសម្រាប់ការជំរុញពាណិជ្ជកម្មអន្តរជាតិប្រទេសចិននិងជានាយកប្រតិបត្តិនៃគណៈកម្មាធិការអនុវត្តនៃពិព័រណ៍សាកវប្បកម្មពិភពលោកក្រុងប៉េកាំងបានឱ្យដឹងនៅក្នុងសន្និសីទសារព័ត៌មានកាលពីថ្ងៃទី៨ខែតុលាថា មកដល់បច្ចុប្បន្ននេះ ពិព័រណ៍សាកវប្បកម្មពិភពលោកក្រុងប៉េកាំងជាពិព័រណ៍សាកវប្បកម្មពិភពលោកមួយដែលមានទ្រង់ទ្រាយធំបំផុតនិងមានប្រទេសចូលរួមតាំងពិព័រណ៍ច្រើនបំផុត ក្នុងនោះរួមមានប្រទេសនិងអង្គការអន្តរជាតិចំនួន១១០ ព្រមទាំងអង្គការក្រៅផ្លូវការនៃប្រទេសចិនជាង១២០ដែលរួមមានខេត្ត ទីក្រុង ភូមិភាគចំនួន៣១និងតំបន់ហុងកុង ម៉ាកាវនិងតៃវ៉ាន់ជាដើម ។
លោកស្រី Jiang Zehui ប្រធានសមាគមផ្ការបស់ចិនបានថ្លែងថា ពិព័រណ៍សាកវប្បកម្មពិភពលោកក្រុងប៉េកាំងមិនត្រឹមតែបានផ្សព្វផ្សាយពីគំនិតនៃអរិយធម៌អេកូឡូស៊ីនិងជំរុញការអភិវឌ្ឍបៃតងប៉ុណ្ណោះទេ ថែមទាំងបានជំរុញការផ្លាស់ប្តូរនិងកិច្ចសហប្រតិបត្តិការក្នុងវិស័យសាកវប្បកម្មពិភពលោកផងដែរ ។
សូមបញ្ជាក់ថា បន្ទាប់ពីបញ្ចប់ពិព័រណ៍សាកវប្បកម្មពិភពលោកនេះ សួននេះនឹងត្រូវបង្កើតជាមូលដ្ឋានគំរូនៃអរិយធម៌អេកូឡូស៊ីនិងកន្លែងទេសចរណ៍សម្រាប់ប្រជាពលរដ្ឋ ហើយនឹងផ្តល់ការធានាសេវាកម្មសម្រាប់ព្រឹត្តិការណ៍ប្រកួតកីឡាអូឡាំពិករដូវរងានិងកីឡាអូឡាំពិករដូវរងាជនពិការឆ្នាំ២០២២ផងដែរ ។
