ថ្ងៃទី ៦ ខែតុលា ឆ្នាំ ២០១៩ អគ្គស្ថានីយវិទ្យុនិងទូរទស្សន៍មជ្ឈិមចិនបានចេញផ្សាយបទអត្ថាធិប្បាយក្រោមចំណងជើងថា «ការច្នៃប្រឌិតថ្មីខាងបច្ចេកវិទ្យាជាកម្លាំងចលករមិនចេះរីងស្ងួតសម្រាប់ការអភិវឌ្ឍរបស់ប្រទេសចិន» ។
អត្ថបទមួយនេះបានបង្ហាញថា ការច្នៃប្រឌិតថ្មីជាទេពកោសល្យយ៉ាងលេចធ្លោរបស់ជនជាតិចិន ហើយក៏ជាកម្លាំងចលករមិនចេះរីងស្ងួតសម្រាប់ការវិវឌ្ឍរីកចម្រើនរបស់ប្រទេសចិនដែរ ។ រដ្ឋាភិបាលចិនបានចាត់ទុកបំណងប្រាថ្នាអំពីជីវភាពរស់នៅដ៏ល្អបវររបស់ប្រជាជនជាគន្លឹះសម្រាប់ជំរុញការច្នៃប្រឌិតថ្មីផ្នែកបច្ចេកវិទ្យា ប្រកាន់ខ្ជាប់ការជំរុញការច្នៃប្រឌិតថ្មីតាមតម្រូវការនៃទីផ្សារ ជំរុញដោយឥតឈប់ឈរឱ្យសហគ្រាសក្លាយទៅជាតួអង្គសំខាន់នៃការច្នៃប្រឌិតថ្មីផ្នែកបច្ចេកវិទ្យា ដើម្បីរិះរកវិធីសាស្រ្តថ្មីសម្រាប់ការអភិវឌ្ឍតាមទម្រង់ច្នៃប្រឌិតថ្មី ពោលគឺវិវឌ្ឍធនធានមនុស្សមានសមត្ថភាពខ្លាំងក្លា បច្ចេកវិទ្យាខ្លាំងក្លា ទៅដល់ដំណាក់កាលឧស្សាហកម្មខ្លាំងក្លា សេដ្ឋកិច្ចខ្លាំងក្លា និងប្រទេសជាតិខ្លាំងក្លា ។ ស្របនឹងពេលធ្វើការច្នៃប្រឌិតថ្មីដោយម្ចាស់ការ ប្រទេសចិនក៏បានឆ្លងតាមរយៈកិច្ចសហប្រតិបត្តិការផ្នែកបច្ចេកវិទ្យាអន្តរជាតិដែលឈរលើមូលដ្ឋានផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ដើម្បីរួមចំណែកយ៉ាងលេចធ្លោសម្រាប់ការដោះស្រាយបញ្ហាដែលមនុស្សជាតិបាននិងកំពុងប្រឈមទៀតផង ។
អត្ថបទមួយនេះបានគូសបញ្ជាក់ទៀតថា ប្រទេសចិនមានសក្តានុពលយ៉ាងធំធេងលើវិស័យនវានុវត្តន៍ ។ នៅពេលអនាគត ប្រទេសចិននឹងដើរតាមនិន្នាការអភិវឌ្ឍន៍នៃបច្ចេកវិទ្យាជាសកល ដើម្បីសម្របខ្លួនទៅនឹងបណ្តាញច្នៃប្រឌិតថ្មីផ្នែកបច្ចេកវិទ្យាជាសកល ចូលរួមយ៉ាងស៊ីជម្រៅក្នុងការធ្វើអភិបាលបច្ចេកវិទ្យាជាសកល ខិតខំក្លាយទៅជាមជ្ឈមណ្ឌលវិទ្យាសាស្រ្តដ៏សំខាន់និងប្រទេសខ្លាំងក្លាផ្នែកច្នៃប្រឌិតថ្មីលើពិភពលោក ហើយទន្ទឹមនឹងពេលសម្រេចការវិវឌ្ឍរីកចម្រើនរបស់ខ្លួន ក៏នឹងផ្តល់ផលប្រយោជន៍ដល់ប្រទេសនិងប្រជាជនកាន់តែច្រើនលើពិភពលោកផងដែរ ៕
