កាលពីថ្ងៃទី ២៧ ខែកញ្ញា លោក វ៉ាង យ៉ាង ប្រធានគណៈកម្មាធិការសភាប្រឹក្សានយោបាយប្រជាជនទូទាំងប្រទេសចិនបានជួបសវនាការជាមួយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានិងសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរនៅក្រុងប៉េកាំង។
ថែ្លងក្នុងកិច្ចជំនួប លោក វ៉ាង យ៉ាង បានពាំនាំនូវការផ្តាំផ្ញើការសួរសុខទុក្ខយ៉ាងកក់ក្តៅនិងការជូនពរដ៏ល្អរបស់លោកប្រធានរដ្ឋចិន ស៊ីជីនភីង និងលោកជំទាវជូនដល់ព្រះករុណាព្រះបាទសម្តេចព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនីនាថ សីហនុ ។លោក វ៉ាង យ៉ាង បានថែ្លងថា មិត្តភាពរវាងចិននិងកម្ពុជាមានប្រវត្តិយូរលង់ណាស់មកហើយ។ភាគីចិនវាយតម្លៃខ្ពស់ចំពោះការអភិវឌ្ឍរបស់កម្ពុជាក្នុងការកសាងបុព្វហេតុជាតិនិងសម្តែងការកោតសរសើរចំពោះការចូលរួមចំណែកដ៏សំខាន់របស់រាជវង្សានុវង្សកម្ពុជាក្នុងការជំរុញទំនាក់ទំនងរវាងចិននិងកម្ពុជា។ភាគីចិនយកចិត្តទុកដាក់លើការអភិវឌ្ឍទំនាក់ទំនងរវាងប្រទេសទាំងពីរនិងមានឆន្ទៈក្នុងការអនុវត្តនូវផែនការសកម្មភាពស្តីពីការកសាងសហគមន៍រួមវាសនារវាងចិននិងកម្ពុជា ក៏ដូចជាធ្វើការផ្លាស់ប្តូរកម្រិតខ្ពស់បន្ថែមទៀតជាមួយកម្ពុជាដើម្បីលើកកម្ពស់ការកសាងគំនិតផ្តួចផ្តើម"ខ្សែក្រវាត់និងផ្លូវ"និងធ្វើឱ្យស៊ីជម្រៅនូវកិច្ចសហប្រតិបត្តិការជាក់ស្តែងលើវិស័យផ្សេងៗ។
ព្រះករុណាព្រះបាទសម្តេចព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនីនាថ សីហនុ បានផ្តាំផ្ញើលោក វ៉ាង យ៉ាង ពាំនាំនូវការសួរសុខទុក្ខដោយស្មោះជូនដល់លោកប្រធានរដ្ឋចិន ស៊ីជីនភីង និងលោកជំទាវនិងសម្តែងការអបអរសាទរយ៉ាងកក់ក្តៅចំពោះខួបគម្រប់ ៧០ ឆ្នាំនៃការបង្កើតសាធារណរដ្ឋប្រជាមានិតចិន ហើយវាយតម្លៃខ្ពស់ចំពោះសមិទ្ធផលដ៏អស្ចារ្យរបស់ចិនក្នុងការកសាងសេដ្ឋកិច្ច។កម្ពុជាសូមថ្លែងអំណរគុណដល់ប្រទេសចិនចំពោះមិត្តភាពដ៏ជ្រាលជ្រៅជាមួយរាជវង្សានុវង្សកម្ពុជានិងផ្តល់ការគាំទ្រយ៉ាងខ្លាំងចំពោះការអភិវឌ្ឍផែ្នកសេដ្ឋកិច្ចនិងសង្គមរបស់កម្ពុជា។កម្ពុជារីករាយពង្រឹងការផ្លាស់ប្តូរនិងកិច្ចសហប្រតិបត្តិការជាមួយប្រទេសចិនលើគ្រប់វិស័យដើម្បីជំរុញការអភិវឌ្ឍទំនាក់ទំនងរវាងប្រទេសទាំងពីរឱ្យកាន់តែប្រសើរឡើងនៅក្នុងយុគសម័យថ្មី៕