កាលពីថៃ្ងទី ២៤ ខែកញ្ញាវិទ្យុអន្តរជាតិចិនបានចេញផ្សាយបទអត្ថាធិប្បាយមួយក្រោមចំណងជើងថា<ប្រទេសចិនបន្តបញ្ចេញនូវ"កម្លាំងវិជ្ជមាន"ដើម្បីទប់ទល់នឹងបម្រែបម្រួលអាកាសធាតុជាសកល>។
អត្ថបទចង្អុលបង្ហាញថា លោក វ៉ាង យី រដ្ឋមន្រ្តីក្រសួងការបរទេសចិនដែលជាតំណាងពិសេសរបស់លោកប្រធានរដ្ឋចិន ស៊ីជីនភីង បានថ្លែងនៅក្នុងសន្និសីទកំពូលស្តីពីប្រតិបត្តិការអាកាសធាតុរបស់អង្គការសហប្រជាជាតិដែលបានប្រារព្ធឡើងកាលពីថ្ងៃទី ២៣ ខែកញ្ញានេះ ថា ប្រទេសចិននឹងបំពេញកាតព្វកិច្ចរបស់ខ្លួនយ៉ាងហ្មត់ចត់ដោយអនុលោមតាម<អនុសញ្ញាស្តីពីបម្រែបម្រួលអាកាសធាតុក្នុងក្របខ័ណ្ឌអង្គការសហប្រជាជាតិ>និង<កិច្ចព្រមព្រៀងក្រុងប៉ារីស> ពោលគឺនឹងសម្រេចគោលដៅនៃការចូលរួមចំណែកដោយម្ចាស់ការទៅតាមការគ្រោងទុក។នេះគឺជាពាក្យសន្យាជាថ្មីម្តងទៀតរបស់ប្រទេសចិនដែលជាការឆ្លើយតបយ៉ាងច្បាស់លាស់ចំពោះការទប់ទល់នឹងបម្រែបម្រួលអាកាសធាតុជាលក្ខណៈអន្តរជាតិដោយបានបង្ហាញយ៉ាងពេញលេញនូវការប្តេជ្ញាចិត្តនិងទំនួលខុសត្រូវរបស់មហាប្រទេសមួយដែលមានទំនួលខុសត្រូវ។
អត្ថបទបានឱ្យដឹងទៀតថា ដើម្បីទប់ទល់នឹងនិន្នាការអាកាសធាតុកាន់តែក្តៅឡើងៗ សន្និសីទកំពូលស្តីពីប្រតិបត្តិការអាកាសធាតុនៃអង្គការសហប្រជាជាតិលើកនេះបានផ្តោតសំខាន់ទៅលើប្រតិបត្តិការក្នុងវិស័យធំៗចំនួន ៩ ក្នុងនោះរួមទាំងមូលធនអាកាសធាតុនិងការផ្លាស់ប្តូរទម្រង់អភិវឌ្ឍខាងថាមពលជាដើម ។ មុនពេលបើកធ្វើសន្និសីទកំពូលលើកនេះ ប្រទេសចិនបានចេញផ្សាយ « គោលជំហរនិងប្រតិបត្តិការរបស់ភាគីចិនស្តីពីសន្និសីទកំពូលស្តីពីប្រតិបត្តិការអាកាសធាតុនៃអង្គការសហប្រជាជាតិ» ដោយបានបញ្ជាក់ថា នឹងបន្តអនុវត្តជាក់ស្តែងនូវ « កិច្ចព្រមព្រៀងក្រុងប៉ារីស» តាមពាក្យសន្យារបស់ខ្លួនតទៅទៀត។នៅក្នុងសន្និសីទកំពូលលើកនេះ ប្រទេសចិនបានក្លាយជាអ្នកនាំមុខនៃ”គម្រោងដំណោះស្រាយតាមបែបធម្មជាតិ” ដែលជំរុញឱ្យភាគីពាក់ព័ន្ធនានាខិតខំប្រឹងប្រែងក្នុងការទប់ទល់នឹងហានិភ័យនៃបម្រែបម្រួលអាកាសធាតុតាមវិធីសាស្ត្របែបធម្មជាតិ ហើយទទួលបានការកោតសសើរពីបណ្តាភាគីនានាផងដែរ។លោកអគ្គលេខាធិការអង្គការសហប្រជាជាតិបានវាយតម្លៃថា ប្រទេសចិនបានដើរតួនាទីយ៉ាងសំខាន់ក្នុងការដឹកនាំការអនុវត្តប្រតិបត្តិការអាកាសធាតុ ។
បទវិភាគបានសង្កត់ធ្ងន់ថា បច្ចុប្បន្ននេះ ការគ្រប់គ្រងនិងដោះស្រាយបញ្ហាអាកាសធាតុពិភពលោកកំពុងឈានចូលដំណាក់កាលគន្លឹះ។ គោលការណ៍ដែលថាប្រទេសអភិវឌ្ឍន៍និងប្រទេសកំពុងអភិវឌ្ឍន៍មាន "ទំនួលខុសត្រូវរួមប៉ុន្តែមានកាតព្វកិច្ចខុសគ្នា" មិនត្រឹមតែមិនហួសសម័យទេ ប៉ុន្តែថែមទាំងត្រូវអនុវត្តយ៉ាងជាក់លាក់ជាបន្តទៀត។ ក្នុងដំណើរពហុភាគីនេះ ប្រទេសចិនដែលប្រកាន់ខ្ជាប់ការអភិវឌ្ឍបៃតងនិងកសាងប្រព័ន្ធអេកូឡូស៊ី នឹងបន្តបញ្ចេញកម្លាំងវិជ្ជមានរបស់ខ្លួនតទៅទៀត៕
