កាលពីថ្ងៃទី២៣ខែកញ្ញា វិទ្យុយើងបានចេញផ្សាយបទអត្ថាធិប្បាយមួយក្រោមចំណងជើងថា “មូលធនអន្តរជាតិកាន់តែច្រើនឡើងៗមានសុទិដ្ឋិនិយមចំពោះការវិនិយោគទៅលើភាគហ៊ុនAនៃប្រទេសចិន” ។
អត្ថបទបង្ហាញថា ទន្ទឹមនឹងការសម្រេចចិត្តរបស់សន្ទស្សន៍ S&P Dow Jones ដែលបានដាក់បញ្ជូលភាគហ៊ុនA របស់ចិនចូលក្នុងសន្ទស្សន៍ស្តង់ដារសកលនៃទីផ្សារបង្កើតឡើងថ្មីនៃ S&P ជាផ្លូវការ ក្រុមហ៊ុនសន្ទស្សន៍អន្តរជាតិធំៗទាំងបីសុទ្ធតែបង្ហាញការស្វាគមន៍ចំពោះភាគហ៊ុនA របស់ចិន ។ នេះបានបង្ហាញថា កម្លាំងទាក់ទាញនៃទីផ្សារមូលធនចិននិងសេដ្ឋកិច្ចចិនបានបន្តកើនឡើងឥតឈប់ឈរ ហើយមូលធនអន្តរជាតិកាន់តែច្រើនឡើងៗមានសុទិដ្ឋិនិយមចំពោះការវិនិយោគទៅលើភាគហ៊ុនAនៃប្រទេសចិន ។
អត្ថបទនេះថ្លែងថា មូលហេតុសំខាន់ដែលធ្វើឱ្យទីផ្សារមូលធនចិនទទួលបានការគាំទ្រពីសំណាក់មូលធនអន្តរជាតិ គឺដោយសារបរិបទគោលនយោបាយរូបិយវត្ថុនៃតួអង្គសេដ្ឋកិច្ចរីកចម្រើនដូចជាអាមេរិកនិងប្រទេសអឺរ៉ុបជាដើមបានប្រែទៅជាភាពរលុងនាពេលបច្ចុប្បន្ននេះ ហើយប្រទេសចិនជាតួអង្គសេដ្ឋកិច្ចតែមួយគត់ក្នុងចំណោមតួអង្គសេដ្ឋកិច្ចសំខាន់ៗដែលរក្សាស្ថិរភាពគោលនយោបាយរូបិយវត្ថុជាមួយនឹងការប៉ាន់តម្លៃចំពោះប្រាក់យាន់ចិននៅតែរក្សាភាពទាបបង្គួរ និងមានស្ថិរភាពជាងគេ ប្រទេសចិនត្រូវគេរំពឹងទុកថាអាចក្លាយជាកន្លែងប្រមូលផ្តុំមូលធនពិភពលោក។ព្រមពេលជាមួយគ្នា ប្រទេសចិនកំពុងតែជំរុញកំណែទម្រង់នៃទីផ្សារមូលធន ការនេះបានធ្វើឱ្យមូលធនអន្តរជាតិមើលឃើញនូវអនាគតដ៏ល្អរបស់ទីផ្សារមូលធនចិន និងបានបង្កើនជំនឿទុកចិត្តវិនិយោគនៅប្រទេសចិន។
អត្ថបទបាននិយាយថា បច្ចុប្បន្ន ការការពារនិយមនិងឯកតោភាគីនិយមកំពុងកើនឡើង សេដ្ឋកិច្ចពិភពលោកកំពុងប្រឈមនឹងសម្ពាធនៃការធ្លាក់ចុះ ហើយមូលធនអន្តរជាតិមានសុទិដ្ឋិនិយមចំពោះភាគហ៊ុនA នៃប្រទេសចិន ដែលធាតុពិតរបស់វាគឺមានសុទិដ្ឋិនិយមចំពោះសេដ្ឋកិច្ចចិន ។ ការហូរចូលនៃមូលធនអន្តរជាតិក៏មានប្រយោជន៍ដល់ការអភិវឌ្ឍនៃទីផ្សារមូលធនចិនបន្ថែមទៀត ។ ក្នុងសភាពការណ៍ដែលសេដ្ឋកិច្ចពិភពលោកកំពុងប្រឈមនឹងភាពមិនប្រាកដប្រជាកាន់តែខ្លាំង ទីផ្សារមូលធនចិនបានបញ្ជាក់ឱ្យឃើញនូវភាពរឹងមាំ កម្លាំងរស់រវើកនិងសក្តានុពលនៃសេដ្ឋកិច្ចចិន ដែលបានបញ្ចូលស្ថិរភាពដល់ទីផ្សារមូលធនពិភពលោកនិងសេដ្ឋកិច្ចពិភពលោក ។ ការធ្វើវិនិយោគនៅប្រទេសចិនឱ្យបានកាន់តែឆាប់នឹងកាន់តែល្អ វាកំពុងក្លាយជានិន្នាការអន្តរជាតិ ៕