កាលពីរសៀលថ្ងៃទី ១០ ខែកញ្ញា លោក លីខឺឈាង នាយករដ្ឋមន្រ្តីចិនបានជួបពិភាក្សាការងារជាមួយតំណាងសហរដ្ឋអាមេរិកដែលអញ្ជើញចូលរួមកិច្ចសន្ទនារវាងសហគ្រិនចិននិងអាមេរិកនៅទីស្តីការរដ្ឋ Zhong Nanhai នៅក្រុងប៉េកាំង។តំណាងនៃមជ្ឈដ្ឋានឧស្សាហកម្មនិងពាណិជ្ជកម្មព្រមទាំងអតីតមន្រ្តីជាន់ខ្ពស់អាមេរិកបានបង្ហាញនូវទស្សនៈនិងសំណើរបស់ខ្លួនជុំវិញទំនាក់ទំនងផែ្នកសេដ្ឋកិច្ចនិងពាណិជ្ជកម្មរវាងចិននិងអាមេរិកជាដើម។
ថែ្លងក្នុងកិច្ចជំនួប លោក លីខឺឈាង បានលើកឡើងថា ឆ្នាំនេះគឺជាខួបទី ៤០ នៃការបង្កើតទំនាក់ទំនងការទូតរវាងចិននិងសហរដ្ឋអាមេរិក។ក្នុងរយៈពេល ៤០ ឆ្នាំកន្លងមក ទំនាក់ទំនងផែ្នកសេដ្ឋកិច្ចនិងពាណិជ្ជកម្មរវាងប្រទេសទាំងពីរបានបន្តអភិវឌ្ឍទៅមុខឥតឈប់ឈរនិងសម្រេចបាននូវផលប្រយោជន៍ដែលផ្តល់ដល់គ្នាទៅវិញទៅមកនិងឈ្នះ-ឈ្នះ។
លោក លីខឺឈាង បានចង្អុលបង្ហាញថា ទ្វារនៃការបើកទូលាយទៅកាន់ពិភពខាងក្រៅនៃប្រទេសចិននឹងកាន់តែទូលំទូលាយនិងមានការប្តេជ្ញាចិត្តក្នុងការបង្កើតបរិយាកាសពាណិជ្ជកម្មដែលផ្តោតសំខាន់លើទីផ្សារភាវូបនីយកម្ម ការគ្រប់គ្រងតាមច្បាប់និងអន្តរជាតូបនីយកម្ម។លោកបន្តថា ប្រទេសចិនមានទីផ្សារធំទូលំទូលាយនិងស្វាគមន៍សហគ្រាសមកពីបណ្តាប្រទេសនានា រួមទាំង សហរដ្ឋអាមេរិកដើម្បីពង្រីកកិច្ចសហប្រតិបត្តិការលើវិស័យសេដ្ឋកិច្ចនិងពាណិជ្ជកម្មនៅប្រទេសចិនដើម្បីទទួលបាននូវផលប្រយោជន៍ទៅវិញទៅមកនិងឈ្នះ-ឈ្នះកាន់តែល្អប្រសើរ។
ជាការឆ្លើយបត តំណាងសហរដ្ឋអាមេរិកបានថែ្លងថា សហគ្រាសអាមេរិកបានទទួលការលើកទឹកចិត្តតាមរយៈវិធានការថ្មីៗរបស់ប្រទេសចិនក្នុងការពង្រីកការបើកទូលាយ ហើយនឹងមានទស្សនៈវិស័យវែងឆ្ងាយអំពីជម្លោះសេដ្ឋកិច្ចនិងពាណិជ្ជកម្មរវាងអាមេរិកនិងចិននាពេលបច្ចុប្បន្ននេះ។តំណាងអាមេរិករំពឹងថា កិច្ចពិគ្រោះពិភាក្សាផ្នែកសេដ្ឋកិច្ចនិងពាណិជ្ជកម្មរវាងប្រទេសទាំងពីរនឹងទទួលវឌ្ឍនភាពជាវិជ្ជមាននិងឈានដល់កិច្ចព្រមព្រៀងមួយក្នុងពេលឆាប់ៗនេះ៕
