កាលពីថ្ងៃទី ២៩ ខែសីហានៅក្រុងប៉េកាំង លោកស៊ីជីនភីង ប្រធានរដ្ឋចិនបានជួបសន្ទនាជាមួយលោកRodrigo Duterte ប្រធានាធិបតីហ្វីលីពីនដែលកំពុងបំពេញទស្សនកិច្ចនៅប្រទេសចិន ។
លោកស៊ីជីនភីងថ្លែងថា សន្តិភាព ការអភិវឌ្ឍ កិច្ចសហប្រតិបត្តិការនិងភាពឈ្នះ-ឈ្នះគឺជានិន្នាការយុគសម័យដែលមិនអាចរារាំងបាន ។ ត្រូវតែជំរុញយ៉ាងខ្លាំងនូវការតភ្ជាប់គំនិតផ្តួចផ្តើមខ្សែក្រវាត់និងផ្លូវជាមួយនឹងផែនការកសាងនៃភាគីហ្វីលីពីន ។ ប្រទេសចិននិងហ្វីលីពីនគួរតែខិតខំប្រឹងប្រែងជំរុញក្រមប្រតិបត្តិសមុទ្រចិនខាងត្បូងឱ្យបានឈានដល់ក្នុងពេលឆាប់ៗ ។
លោកRodrigo Duterte បានសម្តែងការអបអរសាទរខួប ៧០ ឆ្នាំនៃការបង្កើតសាធារណរដ្ឋប្រជាមានិតចិន ដោយបានថ្លែងថា បទពិសោធន៍នៃការអភិវឌ្ឍប្រទេសចិនដោយជោគជ័យគួរឱ្យហ្វីលីពីនរៀនសូត្រតាម ។ ប្រទេសចិនជាមិត្តដ៏ស្មោះត្រង់របស់ហ្វីលីពីន ។ លើបញ្ហាហុងកុង ហ្វីលីពីនគោរពទាំងស្រុងចំពោះច្បាប់និងសិទ្ធិគាំពារការគ្រប់គ្រងតាមច្បាប់របស់ចិន ។ ភាគីហ្វីលីពីនរីករាយពន្លឿនការអភិវឌ្ឍលើវិស័យប្រេងនិងឧស្ម័នលើសមុទ្រជាមួយភាគីចិន ហើយប្តេជ្ញាជំរុញបណ្តាភាគីនានាឱ្យសម្រេចបាននូវក្រមប្រតិបត្តិសមុទ្រចិនខាងត្បូងក្នុងពេលឆាប់ៗ ៕