ព្រឹត្តិការណ៍អបអរសាទរខួបទី ៧០ ឆ្នាំនៃការបង្កើតសាធារណរដ្ឋប្រជាមានិតចិននឹងប្រារព្ធឡើងយ៉ាងឱឡារិកនៅទីលានធានអានមិនក្រុងប៉េកាំងនៅថ្ងៃទី ១ ខែតុលាដែលជាថ្ងៃបុណ្យជាតិចិន ។ លោកស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន ប្រធានរដ្ឋនិងជាប្រធាននៃគណៈកម្មាធិការយោធាមជ្ឈិមចិននឹងថ្លែងសុន្ទរកថាសំខាន់ៗ ។ ក្នុងព្រឹត្តិការណ៍នេះមានពិធីត្រួតពលនិងដង្ហែក្បួនព្យុហយាត្រាយ៉ាងឱឡារិកផងដែរ ។
សកម្មភាពអបអរសាទរជាច្រើនរួមមានការផ្តល់មេដាយកិត្តិយសជាតិ មេដាយមិត្តភាពនិងគ្រឿងឥស្សរិយយសជាតិដល់ឥស្សរជនជាតិនិងអន្តរជាតិដ៏ឆ្នើមបំផុតដែលបានរួមចំណែកដ៏សំខាន់ក្នុងការកសាងសង្គមនិយមដែលមានលក្ខណៈពិសេសចិននិងការពារជាតិ ព្រមទាំងបានរួមចំណែកដ៏សំខាន់ក្នុងការកសាងទំនើបកម្មនៃសង្គមនិយមដែលមានលក្ខណៈពិសេសចិននិងជំរុញការផ្លាស់ប្តូរនិងកិច្ចសហប្រតិបត្តិការរវាងចិននិងអន្តរជាតិក៏ដូចជាគាំពារសន្តិភាពពិភពលោក និងបានរួមចំណែកដ៏សំខាន់ក្នុងការអភិវឌ្ឍគ្រប់វិស័យនិងមុខរបរនានានៃប្រទេសចិន ។ លោកស៊ីជីនភីងនឹងផ្តល់មេដាយ គ្រឿងឥស្សរិយយសនិងវិញ្ញាបនបត្រដល់ឥស្សរជនទាំងនេះ ។
ក្រៅពីនេះ សកម្មភាពអបអរសាទរថ្ងៃបុណ្យជាតិនឹងប្រារព្ធឡើងនៅទីលានធានអានមិនក្រុងប៉េកាំងនៅយប់ថ្ងៃទី ១ ខែតុលា ។ ដល់ពេលនោះ មេដឹកនាំបក្សនិងជាតិព្រមទាំងតំណាងមហាជនមកពីគ្រប់មជ្ឈដ្ឋាន នឹងចូលរួមទស្សនាការសម្តែងសិល្បៈនិងការបាញ់កាំជ្រួចផងដែរ ។
