ថ្ងៃទី ២២ ខែកក្កដា លោកស៊ី ជីនភីង ប្រធានរដ្ឋចិនបានជួបពិភាក្សាការងារជាមួយព្រះអង្គម្ចាស់Mohammed bin Zayed Al Nahyan ព្រះរជ្ជទាយាទនៃអាណាចក្រAbu Dhabi នៃប្រទេសអេមីរ៉ាតអារ៉ាប់រួមនៅក្រុងប៉េកាំង ។
ក្នុងកិច្ចជំនួប លោកស៊ី ជីនភីងបានថ្លែងថា ប្រទេសចិនរីករាយរួមសហការជាមួយភាគីអេមីរ៉ាតអារ៉ាប់រួមដើម្បីរក្សាភាពនឹងនរក្នុងភាពស្មុគស្មាញ និងឆ្ពោះទៅកាន់ទិសដៅរបស់ខ្លួនក្នុងស្ថានការណ៍បម្រែបម្រួល សំដៅជំរុញទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសចិននិងអេមីរ៉ាតអារ៉ាប់រួមឱ្យទទួលបានសមិទ្ធផលថ្មីជាបន្តបន្ទាប់ក្នុងន័យផ្តល់ផលប្រយោជន៍និងសុភមង្គលកាន់តែច្រើនជូនដល់ប្រជាជននៃប្រទេសទាំងពីរ ។
ជាការឆ្លើយតប ព្រះអង្គម្ចាស់ Mohammed មានព្រះបន្ទូលថា ភាគីអេមីរ៉ាតអារ៉ាប់រួមរីករាយចូលរួមយ៉ាងសកម្មនិងដើរតួនាទីកាន់តែច្រើនក្នុងកិច្ចកសាងគំនិតផ្តួចផ្តើម”ខ្សែក្រវាត់និងផ្លូវ” ព្រមនិងសិក្សារួមគ្នាជាមួយភាគីចិនអំពីការធ្វើកិច្ចសហប្រតិបត្តិការជាមួយទីផ្សារភាគីទី ៣ ។ អេមីរ៉ាតអារ៉ាប់រួមរីករាយពង្រីកការវិនិយោគ ការផ្គត់ផ្គង់ថាមពល និងទំហំពាណិជ្ជកម្មជាមួយប្រទេសចិន បង្កើនកិច្ចផ្លាស់ប្តូរនិងកិច្ចសហប្រតិបត្តិការលើវិស័យហិរញ្ញវត្ថុ អាកាសចរណ៍ និងវប្បធម៌មនុស្សជាតិជាដើម ក៏ដូចជាផ្តល់ការគាំទ្រក្នុងកិច្ចសហប្រតិបត្តិការផ្នែកបច្ចេកវិទ្យាជាមួយក្រុមហ៊ុនចិនផងដែរ ៕
