ថ្ងៃទី ១២ ខែកក្កដា នៅក្រុងប៉េកាំង លោកស៊ី ជីនភីង ប្រធានរដ្ឋចិនបានជួបពិភាក្សាការងារជាមួយលោកស្រី Nguyen Thi Kim Ngan ប្រធានរដ្ឋសភានៃប្រទេសវៀតណាមដែលអញ្ជើញបំពេញទស្សនកិច្ចផ្លូវការនៅប្រទេសចិន ។
ក្នុងកិច្ចជំនួប លោកស៊ី ជីនភីងបានលើកឡើងថា ប្រទេសចិននិងវៀតណាមជាសមមិត្តនិងបងប្អូន ហើយក៏ជាសហគមន៍រួមវាសនាតែមួយដែលប្រកបដោយអត្ថន័យយុទ្ធសាស្រ្តផងដែរ ។ ឆ្នាំ ២០១៩ នេះជាខួបទី ៧០ នៃការបង្កើតទំនាក់ទំនងការទូតរវាងប្រទេសចិននិងវៀតណាម យើងមិនត្រូវបំភ្លេចគោលបំណងដើម ត្រូវមានចក្ខុវិស័យវែងឆ្ងាយ បន្តវេននិងផ្សព្វផ្សាយមិត្តភាព ធ្វើឱ្យស៊ីជម្រៅនូវកិច្ចសហប្រតិបត្តិការ ព្រមនិងជំរុញទំនាក់ទំនងរវាងទ្វេភាគីឱ្យឈានដល់កម្រិតថ្មីថែមទៀតលើទីចាប់ផ្តើមថ្មី ។
លោកស៊ី ជីនភីងបានគូសបញ្ជាក់ទៀតថា សភាតំណាងប្រជាជនទូទាំងប្រទេសចិននិងរដ្ឋសភាវៀតណាមអាចធ្វើការផ្លាស់ប្តូរនិងកិច្ចសហប្រតិបត្តិការឱ្យកាន់តែស្អិតល្មួត ដើម្បីរួមវិភាគទានកាន់តែច្រើនក្នុងការធ្វើឱ្យកាន់តែរឹងមាំនូវមូលដ្ឋាននៃក្តីបំណងប្រាថ្នារបស់ប្រជាជនអំពីទំនាក់ទំនងរវាងចិននិងវៀតណាម ។
ជាការឆ្លើយតប លោកស្រី Nguyen Thi Kim Ngan បានថ្លែងថា បក្សកុម្មុនិយវៀតណាម រដ្ឋ និងប្រជាជនវៀតណាមបានចងចាំជាប់រហូតនូវការគាំទ្រនិងការជួយឧបត្ថម្ភថ្លៃថ្លារបស់មិត្តចិនទាំងអតីតកាលនិងបច្ចុប្បន្ន ។ ភាគីវៀតណាមរីករាយរួមសហការជាមួយភាគីចិន បន្តផ្តល់ការគាំទ្រមុតមាំដល់គ្នាទៅវិញទៅមកក្នុងការអភិវឌ្ឍសង្គមនិយម បន្តវេននិងផ្សព្វផ្សាយមិត្តភាពប្រពៃណីរវាងប្រទេសទាំងពីរ ធ្វើឱ្យស៊ីជម្រៅនូវកិច្ចសហប្រតិបត្តិការដែលផ្តល់ផលប្រយោជន៍ដល់គ្នា គ្រប់គ្រងការខ្វែងគំនិតប្រកបដោយប្រសិទ្ធភាព សំដៅជំរុញទំនាក់ទំនងភាពជាដៃគូសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងប្រទេសវៀតណាមនិងចិនឱ្យទទួលបានការវិវឌ្ឍនរីកចម្រើនកាន់តែច្រើន ៕