ទិន្នន័យដែលក្រសួងពាណិជ្ជកម្មចិនបានប្រកាសកាលពីថ្ងៃទី១១ខែកក្កដាបង្ហាញថា នៅឆមាសទី១នៃឆ្នាំ២០១៩នេះ ប្រទេសចិនបានប្រើប្រាស់ទុនបរទេសជាក់ស្តែងចំនួន៤សែន៧ម៉ឺន៨ពាន់៣រយ៣០លានយាន់ប្រាក់ចិន កើនឡើង៧.២%បើធៀបនឹងរយៈពេលដូចគ្នានៃឆ្នាំ២០១៨ ។ ក្នុងបរិបទបច្ចុប្បន្នដែលហានិភ័យនៃសេដ្ឋកិច្ចពិភពលោកបានកើនឡើងនិងល្បឿនកំណើននៃការវិនិយោគដោយផ្ទាល់ពីបរទេសនៅលើពិភពលោកទាំងមូលហៅកាត់FDI បានបន្ថយជំហាន តែទុនបរទេសជាច្រើននៅតែបន្តហូរចូលទីផ្សារនៃប្រទេសចិន ដែលជាការ"បោះឆ្នោតផ្តល់សេចក្តីទុកចិត្ត"ចំពោះសេដ្ឋកិច្ចចិនតាមការប្រតិបត្តិជាក់ស្តែងរបស់ខ្លួន ។ បើមើលពីទិន្នន័យលម្អិតអាចឃើញថា នៅឆមាសទី១នៃឆ្នាំ២០១៩នេះ ការបណ្តាក់ទុនរបស់ពាណិជ្ជករបរទេសនៅប្រទេសចិនបានលេចចេញលក្ខណៈពិសេសពីរដ៏លេចធ្លោ ពោលគឺទី១ ខ្សែសង្វាក់ឧស្សាហកម្មបានរីកចម្រើនពីកន្លែងទាបទៅបណ្តុំនៅកន្លែងមធ្យមនិងខ្ពស់ ទុនបរទេសជាក់ស្តែងដែលឧស្សាហកម្មបច្ចេកទេសខ្ពស់នៃប្រទេសចិនបានប្រើប្រាស់គឺស្មើនឹង២៨.៨% កើនឡើង៤៤.៣% បើធៀបនឹងរយៈពេលដូចគ្នានៃឆ្នាំ២០១៨ បម្រែបម្រួលនេះសមស្របនឹងនិន្នាការកែប្រែរូបមន្តអភិវឌ្ឍន៍នៃសេដ្ឋកិច្ចចិនដែលបង្វែរពីកំណើនដោយល្បឿនលឿនទៅជាការអភិវឌ្ឍប្រកបដោយគុណភាពខ្ពស់ ។ ទី២ ការវិនិយោគពីតំបន់ជាប្រភពវិនិយោគសំខាន់ៗបានរក្សាភាពនឹងនរ ក្នុងនោះការវិនិយោគរបស់កូរ៉េខាងត្បូង ជប៉ុន អាល្លឺម៉ង់និងសហភាពអឺរ៉ុបនៅប្រទេសចិនបានកើនឡើង៨៣,៨% ១៣,១% ៨១,៣%និង២២,៥%ដោយឡែកពីគ្នា។ ប្រការនេះបានបង្ហាញថា ប្រទេសចិននៅតែជាគោលដៅពេញនិយមក្នុងការទាក់ទាញការវិនិយោគពីពាណិជ្ជករបរទេសដដែល។ បច្ចុប្បន្ននេះ ការគាំពារនិយមនិងឯកតោភាគីនិយមបានរីករាលដាលជាបន្តបន្ទាប់ ដែលបណ្តាលឱ្យវិនិយោគិនអន្តរជាតិខ្វះជំនឿចិត្ត។ ក្នុងឆ្នាំ២០១៨ FDIទូទាំងពិភពលោកបានធ្លាក់ចុះ១៣%បើធៀបនឹងឆ្នាំ២០១៧ ប៉ុន្តែទំហំវិនិយោគរបស់បរទេសនៅទីផ្សារចិនបានកើនឡើង៤%។ ក្នុងឆមាសទី១នៃឆ្នាំ២០១៩នេះ ទំហំវិនិយោគរបស់បរទេសនៅប្រទេសចិនបន្តកើនឡើងដោយផ្ទុយពីស្ថានការណ៍ទូទៅ ដែលបានបង្ហាញម្តងទៀតនូវកម្លាំងទាក់ទាញដ៏អស្ចារ្យនៃសេដ្ឋកិច្ចចិន។
ប្រទេសចិនមានទីផ្សារអ្នកប្រើប្រាស់ដែលមានចំនួន ១៤០០ លាននាក់ និងក្រុមមនុស្សចំណូលមធ្យមដែលមានទ្រង់ទ្រាយធំជាងគេ ដែលបានធ្វើឱ្យទុនវិនិយោគរបស់បរទេសនៅប្រទេសចិនទទួលបានប្រាក់ចំណេញយ៉ាងពិតប្រាកដ ។ ទន្ទឹមនឹងការប្រើប្រាស់របស់ប្រជាជនចិនមានកម្រិតកាន់តែខ្ពស់ឡើងៗ ទុនបរទេសនៅចិនច្បាស់ជាអាចទទួលបានផលកម្រៃកាន់តែច្រើនថែមទៀតជាក់ជាពុំខាន ។ បច្ចុប្បន្ន ប្រទេសចិនបាននិងកំពុងធ្វើការកែសម្រួលរចនាសម្ព័ន្ធសេដ្ឋកិច្ច ផ្លាស់ប្តូររូបមន្តអភិវឌ្ឍន៍និងលើកកម្ពស់កម្រិតនៃផលិតកម្ម សមត្ថភាពច្នៃប្រឌិតថ្មីត្រូវលើកកម្ពស់ជាបន្តបន្ទាប់ ឧត្តមភាពនៃខ្សែសង្វាក់ឧស្សាហកម្មក៏កាន់តែខ្លាំងក្លាថែមទៀត វាបានផ្តល់ជាកម្លាំងចលកសំខាន់សម្រាប់ទុនបរទេសដែលធ្វើអាជីវកម្មកាន់តែយូរនិងកាន់តែច្រើនថែមទៀតនៅប្រទេសចិន ។ទោះបីជាក្នុងពោលបច្ចុប្បនេះសកលភាវូបនីយកម្មសេដ្ឋកិច្ចបានជួបឧបសគ្គជាច្រើនក៏ពិតមែន ប៉ុន្តែប្រទេសចិននៅតែប្រកាន់ខ្ជាប់នូវការបើកទូលាយនិងកែលម្អបរិយាកាសធ្វើអាជីវកម្ម ដើម្បីបង្កើនថែមទៀតនូវទំនុកចិត្តរបស់ពាណិជ្ជករបរទេសមកធ្វើការអភិវឌ្ឍនៅប្រទេសចិន ។ ក្រោមបរិបទនៃការគាំពារនិយមផ្នែកពាណិជ្ជកម្ម ទុនបរទេសមិនគ្រាន់តែមិនបានដកចេញពីប្រទេសចិនប៉ុណ្ណោះទេ ប៉ុន្តែបែរជាបានបន្ថែមការបណ្តាក់ទុននៅប្រទេសចិនទៅវិញ មូលហេតុគឺ ពួកគេមើលឃើញថា ការបន្តឆ្ពោះទៅរកការអភិវឌ្ឍសេដ្ឋកិច្ចប្រកបដោយគុណភាពខ្ពស់របស់ប្រទេសចិន គឺជាឱកាសកំណើនដ៏ធំសម្បើម ៕