កាលពីថ្ងៃទី ២០ ខែមិថុនា លោក ស៊ីជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានរដ្ឋចិនបានជួបពិភាក្សាការងារជាមួយលោក គីមជុងអ៊ុន ប្រធាននៃគណៈកម្មាធិការបក្សពលករកូរ៉េខាងជើងនៅក្រុងព្យុងយ៉ាង។ភាគីទាំងពីរបានឯកភាពគ្នាថា នៅលើចំណុចចាប់ផ្តើមជាប្រវត្តិសាស្ត្រថ្មី ភាគីទាំងពីរ ប្រទេសចិននិងកូរ៉េខាងជើងមានឆន្ទៈពួតដៃជាមួយគ្នាដើម្បីបង្កើតអនាគតដ៏ល្អបវរសម្រាប់ទំនាក់ទំនងរវាងបក្សទាំងពីរនិងប្រទេសទាំងពីរ។
ថ្លែងក្នុងកិច្ចជំនួប លោក ស៊ីជីនភីង បានលើកឡើងថា ឆ្នាំនេះគឺជាខួបទី ៧០ នៃការបង្កើតទំនាក់ទំនងចំណងការទូតរវាងចិននិងកូរ៉េខាងជើង។ដំណើរទស្សនកិច្ចនេះបានធ្វើឡើងដើម្បីពង្រឹងចំណងមិត្តភាពរវាងចិននិងកូរ៉េខាងជើងនិងដើម្បីលើកកម្ពស់ដំណោះស្រាយខាងនយោបាយនៃបញ្ហាឧបទ្វីបកូរ៉េ។ប្រទេសចិនមានឆន្ទៈក្នុងការរក្សានូវទំនាក់ទំនងយ៉ាងស្និទ្ធស្នាលជាមួយកូរ៉េខាងជើង ពង្រឹងទំនុកចិត្តគ្នាទៅវិញទៅមកផ្នែកនយោបាយ ក៏ដូចជាបង្កើនទំនាក់ទំនងជាយុទ្ធសាស្ត្រនិងពង្រីកកិច្ចសហប្រតិបត្តិការជាក់ស្តែង។ប្រទេសចិនមានឆន្ទៈបន្តអនុវត្តឱ្យបានល្អនូវផែនការសកម្មភាពសម្រាប់រម្លឹកខួបទី ៧០ នៃការបង្កើតទំនាក់ទំនងចំណងការទូតជាមួយកូរ៉េខាងជើង ក៏ដូចជាធ្វើការផ្លាស់ប្តូរនិងកិច្ចសហប្រតិបត្តិការក្នុងវិស័យអប់រំ សុខាភិបាលនិងកីឡាជាដើមដើម្បីបង្កើនសុខុមាលភាពរបស់ប្រជាជននៃប្រទេសទាំងពីរ។
ជាការឆ្លើយតប លោក គីមជុងអ៊ុន បានថែ្លងថា ឆ្នាំនេះគឺជាខួបទី ៧០ នៃការបង្កើតទំនាក់ទំនងចំណងការទូតរវាងចិននិងកូរ៉េខាងជើងនិងខួបទី ៧០ នៃការបង្កើតសាធារណរដ្ឋប្រជាមានិតចិន កូរ៉េខាងជើងមានឆន្ទៈរួមសហការជាមួយប្រទេសចិនដើម្បីរៀបចំសកម្មភាពអបអរសាទរយ៉ាងកក់ក្តៅនិងឱឡារិក។នាពេលបច្ចុប្បន្ននេះ បក្សនិងប្រជាជនកូរ៉េខាងជើងកំពុងអនុវត្តយ៉ាងពេញទំហឹងនូវយុទ្ធសាស្ត្រថ្មីដោយផ្តោតសំខាន់លើការអភិវឌ្ឍសេដ្ឋកិច្ចនិងការកែលម្អជីវភាពរស់នៅរបស់ប្រជាជន។
លោក ស៊ីជីនភីង បានវាយតម្លៃជាវិជ្ជមានចំពោះកិច្ចខិតខំប្រឹងប្រែងរបស់កូរ៉េខាងជើងដើម្បីធានារក្សានូវសន្តិភាពនិងស្ថិរភាពនៅឧបទ្វីបនិងជំរុញឱ្យគ្មានអាវុធនុយគ្លេអ៊ែរនៅឧបទ្វីបនេះ។លោក ស៊ីជីនភីង បានសង្កត់ធ្ងន់ថា ប្រទេសចិនមានឆន្ទៈក្នុងការពង្រឹងការសម្របសម្រួលនិងកិច្ចសហប្រតិបត្តិការជាមួយកូរ៉េខាងជើងនិងភាគីពាក់ព័ន្ធនានាដើម្បីដើរតួនាទីជាវិជ្ជមាននិងប្រកបដោយលក្ខណៈស្ថាបនាក្នុងការសម្រេចបាននូវគ្មានអាវុធនុយគ្លេអ៊ែរនៅឧបទ្វីប។
លោក គីមជុងអ៊ុន បានថែ្លងថា កូរ៉េខាងជើងមានឆន្ទៈបន្តពង្រឹងទំនាក់ទំនងគ្នានិងការសម្របសម្រួលជាមួយប្រទេសចិន ខិតខំប្រឹងប្រែងជំរុញឱ្យមានការវិវឌ្ឍថ្មីនៅក្នុងដំណោះស្រាយខាងនយោបាយនៃបញ្ហាឧបទ្វីបនិងធានារក្សានូវសន្តិភាពនិងស្ថិរភាពនៅឧបទ្វីបនេះ៕
